اقمولا وبلىسىندا «قايىرىمدى ۇلت» اكسياسى ءوتتى

كوكشەتاۋ. قازاقپارات - اقمولا وبلىسىنىڭ مادەنيەت سالاسىنىڭ قىزمەتكەرلەرى «قايىرىمدى ۇلت» اكسياسىنا ۇلەس قوستى، دەپ حابارلايدى قازاقپارات ءتىلشىسى.

«بۇگىن 23-ناۋرىز كۇنى بۇكىل ەل بويىنشا «قايىرىمدى ۇلت» اۋقىمدى قايىرىمدىلىق اكسياسى ۇيىمداستىرىلدى. اقمولا وبلىسىنىڭ مادەنيەت مەكەمەلەرى دە اۋقىمدى ءىس- شاراعا بەلسەنە ات سالىستى»، - دەدى اقمولا وبلىستىق مادەنيەت باسقارماسىنىڭ باسپا ءسوز قىزمەتىنەن.

اكسيا اياسىندا بالالار ءۇيىنىڭ تاربيەلەنۋشىلەرى، مۇمكىندىگى شەكتەۋلى بالالار مەن قارتتار ءۇشىن كوشپەلى مەرەكەلىك كونتسەرت وتكىزىلدى.

«وبلىستىڭ ۇزدىك شىعارماشىلىق ۇجىمدارى كوكشەتاۋ قالاسىنىڭ ارنايى الەۋمەتتىك قىزمەتتەر كورسەتۋ ورتالىعى، تىرەك- قيمىل اپپاراتى بۇزىلعان بالالارعا ارنالعان كوكشەتاۋ بالالار پسيحونيەۆرولوگيالىق مەكەمەسى، «ايالاۋ» ورتالىعىنىڭ بالالارى مەن 18 جاستان اسقان ەرەكشە قاجەتتىلىكتەرى بار ازاماتتارعا كونتسەرتتىك باعدارلامالارىن ۇسىندى. سونداي- اق ءىس- شارا بارىسىندا بالالارعا مەرەكەلىك سىيلىقتار ۇلەستىرىلدى»، - دەپ قوستى ۆەدومستۆودان.

«قايىرىمدى ۇلت» اكسياسى ودان ءارى جالعاسىن تابۋدا.