يزەندى - ۇلتتىق ونەردى ناسيحاتتايتىن، اراق- شاراپ ساتىلمايتىن اۋىل
جىلقىنى قۇرىقتاپ، كوكپار تارتاتىن جاستار قاتارى اۋىلدى جىلدان جىلعا كوبەيىپ كەلەدى، دەپ حابارلايدى قازاقپارات ءتىلشىسى.
ءۇيىر- ءۇيىر جىلقىنى شۇرقىراتىپ، اساۋدى ارقانسىز قۇرىقتايتىن جىگىتتەر ەن دالادا ءجۇر. يزەندى جاستارى جاستايىنان جىلقى جالىندا ويناپ، قامبار اتا بالاسىن جانىنداي جاقسى كورەدى. اسىرەسە شالما سالعاندا الدارىنا جان سالمايدى.
«شالما سالعان جەڭىلىرەك قۇرىققا قاراعاندا. قۇرىقتاۋدىڭ بەينەتى كوپ، ءبىراز جۇگىرۋ كەرەك بولادى. شالما سالۋ ءۇشىن الماتى قالاسىنا ساپالى ارقانعا تاپسىرىس بەردىك. ونىڭ ورتاسىنداعى شەڭبەردى وزىمىزگە ىڭعايلى ەتىپ جاسايمىز. جىلقى قاي جەرگە، قانداي قاشىقتىققا قاشاتىنىن جوبالاپ ولشەپ، اينالدىرىپ جاساپ الامىز. ۇزىندىعىن دا ءوز ىڭعايىمىزعا قاراي ولشەيمىز»، - دەيدى يزەندى اۋىلىنىڭ تۇرعىنى ەركەبۇلان ىبىراي.
توپتىڭ اراسىنان تاڭداعان تۇلپارىڭا ءدوپ ءتۇسۋ وڭاي ەمەس. ەگەر ەن دالانى ەركىن جورتقان، قۇرىق كورمەگەن جىلقى اساۋ بولسا، ونىڭ ءجونى تىپتەن بولەك. دەگەننمەن اتتىڭ قۇلاعىندا وينايتىن ەرعانات تايجانوۆ اساۋعا تۇساۋ سالا الدى.
«جىلقىنىڭ اساۋ نەمەسە جۋاس بولعانىنا قارامايمىز. شالما سالعاندا ءبىز ارقاندا ەشۋاقىتتا جىبەرە سالمايمىز. مىنگەن اتىمىزدىڭ تاقىمىن باسىپ تەز توقتاتا قالامىز. سوندىقتان اتپەن ءجۇرىپ شالما سالساق، ۇستايتىن جىلقىمىزدىڭ اساۋ بولعانى بىلىنە قويمايدى. ەڭ باستىسى شالمانى شەڭبەرلەتە ءۇيىرىپ وتىرىپ لاقتىرۋ كەرەك. سول كەزدە كوزدەگەن جىلقىعا ءدوپ تۇسەدى. جىل سايىن اۋىلعا ءۇيىر- ءۇير جىلقى كەلگەندە، ۇلكەن كىسىلەر تاي، جاباعىلارىن ۇستاپ بەرۋدى وتىنەدى. سولاردى قۇرىقتايمىز. سودان ولار باتاسىن بەرىپ كەتەدى»، - دەيدى ەرعانات تايجانوۆ.
يزەندى اۋىلىنىڭ سايگۇلىكتە شاپقان جاستارىنان كەڭ دالانىڭ كەمەرلەنگەن كەسكىنىن عانا ەمەس، كەڭدىگىن، ساف ونەردىڭ ءمولدىرىن، قازاق بالاسىنىڭ ورلىگىن كورەسىڭ. مۇنداعى ەڭبەكتەگەن بالادان ەڭكەيگەن قارياعا دەيىن ۇلتتىق ونەردى ناسيحاتتايدى. تەك ناۋرىز مەيرامىندا عانا ەمەس ءار ءۇيدىڭ وتباسىندا بولاتىن قىزىق توي دۋماندا مىندەتتى تۇردە «الامان بايگە» ۇيىمداستىرىلادى. اۋىل جاستارى كوكپار سپورتىن يزەندى تورىندە ۇلىقتاپ ءجۇر. جانكۇيەرلەر دەلەبەسىن قىزدىراتىن بۇل ويىنعا قىزىعۋشىلىق جوعارى. مارقاسقا جىگىتتەردىڭ شابىسىندا، سەركە تارتىسىندا كەمشىلىك جوق دەيدى ماماندار.
«ءار اۋىل ءوز جەتىستىكتەرىمەن ماقتانسا، بىزدە دە ءوز سپورتشىلارمىزدى ماقتان ەتەمىز. وسى ۇلتتىق سپورت تۇرىنەن ءۇش دۇركىن چەمپيونىمىز بار. سونىمەن قاتار اۋل، اۋدان، وبلاستىق جارىستاردا اۋدارىسپاق، كوكپاردان الدىڭعى ورىنداردا كورىنەدى جىگىتتەرىمىز. جاستايىنان بارلىعى اتقا ءمىنىپ، كوشەدە بوس جۇرمەي، ءبىر ءبىرىن سپورتتىق ويىندارعا باۋلىپ، ۇيرەتىپ جۇرەدى»، - دەيدى يزەندى اۋىلىنىڭ اكىمى ايدوس مۇرات ۇلى.
نۇرا اۋدانىنا قاراستى يزەندى اۋىلىندا 700 دەن استام حالىق بار. سالاۋاتتى ءومىر سالتىن ساقتاۋدا ەلدى مەكەندە بارلىق جاعداي جاسالعان. ناۋرىز ايىنان باستاپ يزەندىدەگى ساۋدا ورتالىقتارىندا اراق شاراپ ساتىلمايدى. تۇرعىنداردىڭ ىشىمدىكسىز اۋىل باستاماسىنا كاسىپكەرلەر دە قولداۋ كورسەتۋدە. ەندى جاس تا، جاسامىس تا سالاۋاتتى ءومىر سالتىنا ءبىرجولا دەن قويماق.
