ە و رەسەيگە تاعى سانكتسيالار سالاتىنىن جەتكىزدى
بۇل تۋرالى ۇيىمنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل وداققا مۇشە ەلدەردىڭ سىرتقى ىستەر جانە قورعانىس مينيسترلەرى كەزدەسۋىنەن كەيىن مالىمدەدى.
اقپارعا قاراعاندا وداق رەسەيگە مۇناي ەمبارگوسىن جاريالاپ، سۆيفت تولەم جۇيەسىنەن اجىراتىلماعان بانكتەردى دە بۇعاتتاۋدى قولعا الۋى مۇمكىن. ەۋرووداق بۇعان دەيىن دە رەسەيگە قاتاڭ سانكسيالار ەنگىزگەن. مىسالى، ورتالىق بانكتىڭ اكتيۆتەرىن بۇعاتتاپ، رەسەي مەن بەلارۋستىڭ 600-دەن استام ساياساتكەرى مەن كاسىپكەرىنە جانە ولاردىڭ جاقىندارىنا شەكتەۋ قويعان.
جوزەپ بوررەل، ە و- نىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى:
- سانكسيالار رەسەيگە قاتىستى ءبىزدىڭ ۇستانىمنىڭ ماڭىزدى ءبىر بولىگى بولىپ قالا بەرەدى. ءبىز حالىقارالىق ارىپتەستەرىمىزبەن بىرگە رەسەيگە قارسى قوسىمشا شەكتەۋ شارالارىن قابىلداۋعا دايىنبىز. رەسەي حالىقارالىق جانە گۋمانيتارلىق قۇقىقتى بۇزىپ وتىرعانى ءۇشىن وقشاۋلاۋ جالعاسا بەرەدى. ۋكرايناعا ەكونوميكالىق، قارجىلاي جانە گۋمانيتارلىق تۇرعىدا كومەكتەسىپ، اسكەري كۇشتەرىنە قولداۋ كورسەتە بەرەمىز.
بۇدان بولەك جوزەپ بوررەل ەۋروپالىق وداق ۇيىمنىڭ اسكەري ىقپالىن كۇشەيتۋ ءۇشىن قاۋىپسىزدىك ستراتەگياسىن قابىلداعانىن جەتكىزدى. وعان ساي كۇتپەگەن داعدارىس كەزىندە قولدانىلاتىن 5 مىڭ جاۋىنگەردەن تۇراتىن جەدەل ارەكەت ەتۋ كۇشتەرى قۇرىلاتىن بولادى. بۇل وداقتىڭ 2007 -جىلى جاساقتالعان اسكەري قۇرىلىمدارىن اۋىستىراتىن بولادى.
