لوندوندا جىلقى ەتى جوق، قازى- قارتا تابۋ ءتىپتى قيىن - ۇلى بريتانيادا قازاق دياسپوراسى ناۋرىزدى قالاي تويلادى

لوندون. قازاقپارات - ۇلى بريتانيادا تۇراتىن قازاق دياسپوراسىنىڭ وكىلدەرى ناۋرىز مەرەكەسىن اتاپ ءوتتى. ەرتەرەكتە لوندونعا كوشىپ كەلگەن قانداستارىمىز داستارحان باسىندا جينالىپ، ناۋرىز كوجەدەن ءدام تاتتى، دەپ حابارلايدى قازاقپارات ءتىلشىسى.

«ناۋرىز كوجەگە قوزىنىڭ ەتىن قوستىق. قازى جوق، قازىنى قايدان تابامىز؟»، دەيدى ۇلى بريتانيا قازاعى ءباديعا ساۆاش. ول جەرگىلىكتى قارا كوزدەردىڭ باسىن بىرىكتىرەتىن دياسپورا ءتوراعاسىنىڭ جۇبايى.

بۇل كۇنى ءباديعا حانىم ۇلىستىڭ ۇلى كۇنى جاسالاتىن قاسيەتتى اس - ناۋرىز كوجەنى ومىرىندە بىرىنشە رەت ءپىسىردى. ويتكەنى تۇركيادان وسىندا كوشىپ كەلگەن قازاقتار اراسىندا بۇل ءداستۇر كەڭىنەن تاراماعان. لوندوندا جىلقى ەتى جوق، قازى- قارتا تابۋ ءتىپتى قيىن. ءباديعا حانىم ونىڭ ورنىنا اعىلشىندار اس پىسىرگەندە كەڭىنەن پايدالاناتىن، تىسكە جۇمساق قوزىنىڭ ەتىن جانە التى ءتۇرلى ءدان قوسىپ، ناۋرىز كوجە جاسادى. قىرعىزستاننان جەتكىزىلگەن قۇرت تا استىڭ ءدامىن كەلتىرگەندەي. ءباديعا حانىمنىڭ قازاقستاننان كەلگەن ستۋدەنتتەرگە دەگەن ريزاشىلىعى ەرەكشە. «سولاردىڭ ايتۋىمەن ناۋرىز كوجە ءپىسىرىپ ۇيرەندىم»، - دەيدى ول.

«قيىن ەمەس. ەشقانداي قيىندىعى جوق ەكەن. مەن ناۋرىز كوجە دەگەنگە كۇردەلى اس ەكەن دەپ ويلاۋشى ەدىم. وتە وڭاي جاسالاتىن كوجە ەكەن. ەندى بۇدان كەيىن، بۇل تاعامدى جىلدا جاساپ تۇرارمىن. ءدامدى بولدى. قوناقتارعا ۇنادى»، - دەيدى ءباديعا ساۆاش.

قوناقتار قاتارىندا ۇلى بريتانيادا جۇمىس بابىمەن تۇرىپ جاتقان قازاقستاندىق باعدات دۋسكينوۆا دا بولدى. ول ورال قالاسىنىڭ تۋماسى. لوندوندا مەرەكەلىك شارالاردى بەزەندىرۋمەن اينالىسادى، جولداسى - پروگرامميست. كوپتەن بەرى قازاقتارمەن قاۋىشپاعاندىقتان تۋعان جەرىن ساعىنىپ قالعاندارىن جاسىرمايدى. ونىڭ ۇستىنە قانداستارىمەن بىرگە ۇلىستىڭ ۇلى كۇنىن اتاپ ءوتۋدىڭ ءساتى ءتۇسىپ وتىر.

«باسىمىزدى قوسىپ، ءوزىنىڭ ۇيىندە كەرەمەت توي وتكىزىپ جاتىر. ەت اسىپ، ناۋرىز كوجە ءپىسىردى. جينالعان قازاقتاردىڭ بارلىعى قۋانىشتى. الىستا جۇرگەن قانداستار ءبىرىن- ءبىرى ساعىنادى. ءبىزدىڭ ءداستۇرىمىزدى، ۇلتتىق اس ءمازىرىمىزدى ساعىنامىز»، - دەيدى باعدات دۋسكينوۆا.

ساۆاشتار وتباسى - قىم- قۋىت زاماندا التاي وڭىرىنەن تۇركياعا ودان كەيىن ۇلى بريتانياعا قونىس اۋدارعان قازاقتار. لوندوندا تۇرىپ جاتقاندارىنا 40 جىلعا جۋىق ۋاقىت بولعان. وتاعاسى ءابدىسالىم ساۆاش - جەرگىلىكتى قازاق دياسپوراسىنىڭ ءتوراعاسى.

ونىڭ ايتۋىنشا، لوندوندا وزدەرى سياقتى قىرىقتاي قازاق وتباسى تۇرادى. ءبارى دە كەزىندە تۇركيادان بىرىككەن كورولدىككە قونىس اۋدارعاندار. ءبىر ءدۇيىم جۇرت تاۋەلسىزدىك كۇنى، ناۋرىز، ايت سياقتى مەملەكەتتىك، ۇلتتىق جانە ءدىني مەرەكەلەردى بىرگە تويلايدى.

اۆتور: عالىمجان قارامان ۇلى