ەلوردا تۇرعىندارى ناۋرىز مەيرامىن اتاپ ءوتتى

None
None
نۇر- سۇلتان. قازاقپارات – 22- ناۋرىزدا ەلوردانىڭ 20-دان استام الاڭىندا ناۋرىز مەيرامى تويلاندى. اۋا رايىنىڭ قولايسىزدىعىنا قاراماستان قالا تۇرعىندارى وتباسىلارىمەن الاڭعا كەلىپ، كۇن مەن ءتۇننىڭ تەڭەلگەن، كوكتەمنىڭ باستى مەرەكەسىن اتاپ ءوتتى، دەپ حابارلايدى ەلوردا اكىمدىگىنىڭ رەسمي سايتىنا سىلتەمە جاساپ.

مەملەكەت باسشىسى قاسىم- جومارت توقايەۆ قازاقستاندىقتاردى ناۋرىز مەيرامىمەن قۇتتىقتاپ، بۇل كۇن بەرەكە مەن بىرلىكتىڭ، مەيىرىمدىلىك پەن ءوزارا سىيلاستىقتىڭ قاسيەتتى مەرەكەسى ەكەنىن اتاپ ءوتتى. پرەزيدەنت بۇگىنگى مەرەكە جاڭا وزگەرىستەرگە باستاما بولۋىنا، ال قازاقستان قۋاتتى ءارى ۇيىمشىل مەملەكەت بولىپ دامي بەرۋىنە تىلەكتەستىك ءبىلدىردى.

سونداي- اق، ەلوردا تۇرعىندارىن ناۋرىز مەرەكەسىمەن قالا اكىمى التاي كولگىنوۆ قۇتتىقتادى.


«قالا تۇرعىندارى بۇل مەرەكەنى ىلعي دا ەرەكشە ىقىلاسپەن كۇتەدى، سول سياقتى جۇرتتىڭ ءبىر بىرىنە كومەك قولىن سوزۋى وتباسىلىق جانە مادەني قۇندىلىقتاردىڭ، حالىق بىرلىگىنىڭ جارقىن كورىنىسى بولاتىنىن ايتتى. مەرەكە كۇندەرى ءبىز تۇرمىسى تومەن ازاماتتارعا ازىق- تۇلىك سەبەتتەرىن تاراتۋ اكتسياسىن توقتاۋسىز جالعاستىرامىز. قالادا ناۋرىز مەيرامى اتاپ وتىلەتىن 20-دان استام ورىن، سول سياقتى ەلدى مەكەندەردە دە ورىندار انىقتالدى»، - دەپ اتاپ ءوتتى اكىم.


باستى مادەني- سپورتتىق ءىس- شارالار «قازاق ەلى» الاڭىندا، «جاستار» ساياباعىندا، جازۋشىلار اللەياسىندا، «اتاتۇرىك»، «كوكتال» ساياباقتارىندا، ەكسپو جانە Demalys Promenade الاڭدارىندا ۇيىمداستىرىلدى. بۇدان باسقا، ناۋرىز مەيرامى قالانىڭ بارلىق ەلدى مەكەنىندە وتكىزىلەدى.

«بۇگىن ناۋرىز مەيرامىنا وراي ءىس- شارالار وتكىزىلۋدە. بايقوڭىر اۋدانى بويىنشا مەرەكەلىك ءىس- شارالار 5 ورىندا - «اتاتۇرىك» ساياباعىندا، جازۋشىلار اللەياسىندا جانە ءۇش ەلدى مەكەندە وتكىزىلەدى. مەرەكە كۇنى ساياباقتا كيىز ۇيلەر تىگىلىپ، كونسەرتتىك باعدارلاما ۇيىمداستىرىلىپ، ۇلتتىق سپورت تۇرلەرىنەن جارىستار وتكىزىلەدى. ءار كيىز ۇيدە تەاترلاندىرىلعان قويىلىمداردى تاماشالاۋعا بولادى، تاڭەرتەڭ قوناقتارعا ناۋرىز كوجە مەن پالاۋ تاراتىلدى»، - دەدى بايقوڭىر اۋدانى اكىمىنىڭ ورىنباسارى شۇعىلا قۇدايبەرگەنوۆا.


قالا بويىنشا بەلگىلەنگەن ورىنداردىڭ بارىندە التىباقان، ۇلتتىق ناقىشتا بەزەندىرىلگەن كيىز ۇيلەر ورناتىلىپ، ءداستۇرلى تاعامدار - باۋىرساق پەن ناۋرىز كوجە كەلگەن جۇرتقا تاراتىلدى. قوناقتار ءۇشىن كونتسەرتتىك باعدارلاما ۇيىمداستىرىلىپ، وعان ۇلىقپان جولداسوۆ، دوس، قايرات باەكەنوۆ، گۇلنۇر ورازىمبەتوۆا، الىشەر كارىموۆ، بەيبىت قورعان، سونداي- اق، ەلوردالىق تەاترلاردىڭ ۇجىمدارى قاتىسادى. ءداستۇر بويىنشا ۇلتتىق سپورت تۇرلەرىنەن جارىستار دا وتكىزىلەدى. تىلەك بىلدىرۋشىلەر اسىق اتۋ، قول كۇرەسى، ارقان تارتۋ، گىر كوتەرۋ جانە ت. ب. بويىنشا سىنعا تۇسەدى.


«بيىل ەلوردامىزدا ناۋرىز مەيرامى ۇلكەن اۋقىمدا تويلانىپ جاتقانى قۋانتادى. ءبارى وتە كەرەمەت ۇيىمداستىرىلعان، ناۋرىز كوجەدەن ءدام تاتتىق. كەرەمەت كونسەرتتىڭ كۋاگەرى بولىپ، جارىستار دا قاتىستى. كۇن مەن ءتۇننىڭ تەڭەلگەن، ۇلىستىڭ ۇلى كۇنىن اتاپ ءوتۋ ءۇشىن مەرەكەگە وتباسىمىزبەن كەلدىك»، - دەدى نۇرسۇلتان ەسىمدى قالا تۇرعىنى.

بۇگىنگى مەرەكەگە وزگە ايماقتاردان دا، ءتىپتى شەتەلدەردەن دە ارنايى قوناقتار قاتىستى. «مەنى وسىنداي كەرەمەت مەرەكەگە ارنايى شاقىردى. مەن نۇر- سۇلتاندا بولعانىما وتە قۋانىشتىمىن. قازاقستاندىقتاردى ناۋرىز مەرەكەسىمەن قۇتتىقتايمىن! بارىڭىزگە زور دەنساۋلىق، ەلىمىزگە جارقىن بولاشاق پەن تىنىشتىق تىلەيمىن!» - دەدى مەرەكە قوناعى سانجاي بيدي.

ايتا كەتۋ كەرەك، قالا تۇرعىندارى دا باستاما كوتەرىپ، ءوز اۋلالارىندا كيىز ۇيلەر تىگىپ، داستارقان جايىپ، مەرەكەنى بىرلەسىپ اتاپ وتۋگە ۇلەس قوستى. كەلگەن جۇرتقا ساماۋرىن ءشايى، باۋىرساق جانە پالاۋ تاراتىلدى. ايتا كەتەيىك، بيىل ەلوردا اكىمدىگىنىڭ باستاماسىمەن ناۋرىز مەرەكەسى «قايىرىمدى ىستەر» ۇرانىمەن ءوتىپ جاتىر. مەرەكە اياسىندا قالادا يگى ىستەرگە ارنالعان اكسيالار ۇيىمداستىرىلىپ، مۇقتاج جاندارعا ازىق- تۇلىك سەبەتتەرى تاراتىلادى. ازىق- تۇلىك جيىنتىعىن 1 ناۋرىزدان باستاپ مىڭنان استام مۇقتاج وتباسى الدى. قايىرىمدىلىق ءىس- شاراسىن جۇزەگە اسىرۋعا كاسىپكەرلەر، ەرىكتىلەر جانە قالا تۇرعىندارى كومەك كورسەتەدى.

ۇلتتىق ناۋرىز مەيرامى قارساڭىندا ازىق- تۇلىك جيىنتىعى 600-دەن استام وتباسىعا تاراتىلدى، ولاردىڭ اراسىندا الەۋمەتتىك از قامتىلعان، كوپبالالى وتباسىلار، سونداي- اق جالعىز تۇراتىن زەينەتكەرلەر جانە حالىقتىڭ وزگە دە الەۋمەتتىك ساناتتارى بار. مۇنداي اكسيالار 1- ناۋرىز - العىس ايتۋ كۇنى، 8 -ناۋرىز - حالىقارالىق ايەلدەر كۇنى وتكىزىلدى، وندا 500-دەن استام وتباسىعا ازىق- تۇلىك سەبەتى ۇلەستىرىلگەن بولاتىن.

سوڭعى جاڭالىقتار