سەمەي جاستارى اباي وبلىسىنىڭ قۇرىلۋىنا قاتىستى ويلارىن ورتاعا سالدى

سەمەي. قازاقپارات - سەمەيدە جاستار مەن ەرىكتىلەر اباي وبلىسىنىڭ قۇرىلاتىنىنا قاتىستى پىكىرلەرىن ورتاعا سالدى، دەپ حابارلايدى قازاقپارات ءتىلشىسى.

سەمەي قالاسىنداعى Alikhan Bokeikhan University بازاسىنىڭ كوۆوركينگ ورتالىعىندا Amanat پارتياسىنىڭ جاستارى، جاستاردى قولداۋ كەڭەسىنىڭ مۇشەلەرى، جاستار ۇيىمدارى مەن ەرىكتىلەر باس قوستى.

مۇنداعى ماقسات - اباي وبلىسىنىڭ قۇرىلۋىنا قاتىستى پىكىر الماسۋ.

«جولداۋدىڭ مازمۇنى مەن ءمانى بارلىق قازاقستان حالقى كۇتكەندەي ەرەكشە بولعانى انىق. سونىڭ ىشىندە، ەل پرەزيدەنتىنىڭ سەمەي وڭىرىنە اباي وبلىسىن بەرۋدى ۇسىنعانى ءدۇيىم جۇرتتىڭ كوڭىلىنەن شىقتى. بۇل سەمەي قالاسىنىڭ الەۋمەتتىك-ەكونوميكالىق تۇرعىدان دامۋىنا سەرپىن بەرەدى. جاستارعا ءتيىستى جاعداي جاسالىپ، جاڭا جۇمىس ورىندارى كوپتەپ اشىلادى دەپ سەنەمىز»، - دەدى «Amanat» پارتياسى جاستار قاناتىنىڭ شىعىس قازاقستان وبلىستىق فيليالىنىڭ ءتوراعاسى الماس ايتمۇقاش.

پىكىر الاڭىنا جينالعاندار جولداۋ تۋرالى ءوز ويلارىن ورتاعا سالىپ، جاڭا قازاقستاننىڭ بولاشاعىن بىرلەسىپ قۇراتىنىن جەتكىزدى.

«قاسىم-جومارت كەمەل ۇلى وسى جولداۋىندا اباي ەلىنە دەگەن قۇرمەتىن تاعى ءبىر مارتە كورسەتتى دەپ بىلەمىن. سەمەي جاستارى اباي وبلىسى اتاۋىن قولداپ، پرەزيدەنتىمىزگە ۇلكەن العىس بىلدىرۋدە»، - دەدى سەمەيدەگى بەلسەندى جاستاردىڭ ءبىرى ءالىبي ابدۋرايموۆ.