مەرەكە كۇندەرى استان ۋلانباۋ ءۇشىن نە ىستەۋ كەرەك - سانيتار دارىگەرلەر
س ق و سانيتاريالىق- ەپيدەميولوگيالىق باقىلاۋ دەپارتامەنتى تاماقتانۋ وبەكتىلەرىن باقىلاۋ جانە قاداعالاۋ ءبولىمىنىڭ باسشىسى ناتاليا بەليايەۆانىڭ ايتۋىنشا، مەرەكەلىك داستارحانعا قاجەت ازىق- تۇلىكتى دۇكەندەردەن، ارنايى بازارلاردان نەمەسە ساۋدا ورىندارىنان ساتىپ العان ءجون.
وندا دا ءونىمنىڭ جارامدىلىق مەرزىمىنە، ونىڭ سىرتقى تۇرىنە، يىسىنە، ساقتاۋ جاعدايلارىنا نازار اۋدارۋ قاجەت.
رۇقسات ەتىلمەگەن ساۋدا ورىندارىندا كەزدەيسوق ادامداردان ازىق- تۇلىكتى الۋعا بولمايدى. ول، اسىرەسە، ءسۇت ونىمدەرىنىڭ بارلىق تۇرلەرىنە، شيكى جۇمىرتقا، ءارتۇرلى ەت تۇرلەرىنە، تۋرالعان كوكونىس تاعامدارىنا، كونديتەرلىك ونىمدەرگە، اسىرەسە تورتتارعا قاتىستى. ەڭ قاۋىپتىسى - پىسكەن قۇس ەتى، جۇمىرتقا قوسىلعان تاعامدار، مايونەز جانە قايماق قوسىلعان سالاتتار.
«مەرەكەدە استان ۋلانباۋ ءۇشىن قاراپايىم ەرەجەلەردى ساقتانعان ءجون. ۇيدە مەرەكەلىك تاعامداردى دايىنداۋ كەزىندە ەڭ الدىمەن قولدىڭ، اس ءۇي جابدىقتارىنىڭ، ىدىس-اياقتىڭ تازالىعىن قاداعالاڭىز. شيكى ءونىم مەن دايىن تاعامدى بولەك ساقتاڭىز، ولاردى ازىرلەۋ ءۇشىن بولەك پىشاق پەن كەسۋ تاقتالارىن قولدانىڭىز. جاڭا دايىندالعان تاعامدى كەشەگى تاماق قالدىقتارىمەن ارالاستىرماڭىز. ەگەر دايىن تاعام كەلەسى كۇنگە قالسا، ونى قولدانار الدىندا تەرميالىق وڭدەۋدەن وتكىزۋ قاجەت. ەتتى، قۇس ەتىن، جۇمىرتقانى، تەڭىز ونىمدەرىن جانە مەرەكەلىك تاعامدارعا ارنالعان باسقا ينگرەديەنتتەردى قۋىرۋ، قايناتۋ كەزىندە دۇرىس تەمپەراتۋرالىق رەجيمدى ساقتاۋ جانە ءپىسىرۋ ءۇشىن قاجەتتى ۋاقىتتى ساقتاۋ وتە ماڭىزدى»، - دەيدى ناتاليا بەليايەۆا.
ماماننىڭ ايتۋىنشا، بۇل ەرەجەلەردى مەيرامحانالار، ءدامحانالار جانە ازىق- تۇلىك دۇكەندەرى دە نازاردا ۇستاۋلارى قاجەت. پەرسونال جەكە گيگيەنا ەرەجەلەرىن، ماسكا رەجيمىن ساقتاپ، ازىق- تۇلىكتى ءبىر رەت قولدانىلاتىن قولعاپپەن ساتقانى دۇرىس. جۇمىسقا مەديتسينالىق تەكسەرۋدەن وتكەن پەرسونال عانا جىبەرىلەدى. وسى قاراپايىم الدىن- الۋ شارالارىن ورىنداۋ دەنساۋلىق پەن ءومىردى ساقتاۋعا كومەكتەسەدى.
