الماتىدا «جاڭا قازاقستاندى بىرگە قۇرامىز» اتتى ميتينگ ءوتتى
ش. ءۋاليحانوۆ ەسكەرتكىشىنىڭ الدىندا «جاڭا قازاقستاندى بىرگە قۇرامىز» اتتى ۇرانمەن ۇيىمداستىرىلعان رۇقسات ەتىلگەن ميتينگكە 2-3 مىڭعا جۋىق ادام جينالدى. ولاردىڭ اراسىندا پارتيا جانە قوعام بەلسەندىلەرى، ءماجىلىس دەپۋتاتتارى، كاسىپكەرلەر، عىلىم مەن مادەنيەت سالاسىنىڭ وكىلدەرى، سپورتشىلار، جاستار جانە ەل ەرتەڭىنە بەيجاي قارامايتىن قالا تۇرعىندارى بار.
جيىندا Amanat پارتياسىنىڭ مۇشەلەرى مەن دەپۋتاتتار «جاڭا قازاقستاندى قۇرۋ» جونىندە ءسوز سويلەدى. ءماجىلىس دەپۋتاتى ەرلان سايروۆ قازاقستان حالقىن ەلىمىزدى وركەندەتۋ جولىندا بىرگە بولۋعا شاقىردى. ال دەپۋتات جاناربەك ءاشىمجان قارالى قاڭتار كەزىندە حالىقتى وتقا يتەرگەندەردى ايىپتاپ، جاڭا قازاقستاندى قۇرۋعا جۇمىلا كۇش سالۋ قاجەتتىگىن ايتتى.
«ءبىر كۇن ۇرىس بولعان جەردە - قىرىق كۇن ىرىس بولمايدى» دەگەن ءسوز بار. كۇنى كەشە كوڭىلدى تولقىتقان قاڭتار قاسىرەتى ءبىزدى جاڭا ۇلگىگە باستاۋ كەرەك. سول كۇندەرى بارلىعىمىزدى ءسۇرىندىرىپ، كوزىمىزگە جاس كەلتىرگەن جاعداي كىمنىڭ قولىمەن جاسالدى، كىمدەر ءۇشىن جاسالدى؟ مۇنىڭ بارلىعى جاڭارۋعا، جاسامپازدىققا، ترانسفورماتسياعا كوشكەن قازاق قوعامىن كورە الماي، سوعان كەدەرگى كەلتىرۋ ءۇشىن جاسالعان قادامدار. سول كۇندەرى Amanat پارتياسى فراكسياسىنىڭ مۇشەلەرى سيزولاردا بولىپ، قامالعانداردىڭ، قارا جامىلعان ادامداردىڭ جاعدايىمەن تانىسىپ ولاردى ەلگە، ءتيىستى ورگانداردىڭ الدىنا جەتكىزۋگە كۇش سالدى، - دەدى ول.
