ەلەكتر ەنەرگياسى تاپشىلىعىنا ماينەرلەردىڭ باقىلاۋسىز ءوسۋى سەبەپ بولدى – اقشولاقوۆ

نۇر- سۇلتان. قازاقپارات - ەلەكتر ەنەرگياسى تاپشىلىعىنا جاسىرىن ماينەرلەردىڭ باقىلاۋسىز ءوسۋى سەبەپ بولدى. بۇل تۋرالى ق ر ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«2021 -جىلدىڭ قورىتىندىسى بويىنشا ەلەكتر ەنەرگياسىن ءوندىرۋ كولەمى 114,4 ميلليارد كۆت ساعاتتى قۇرادى. بۇل رەتتە ماينەرلەردىڭ باقىلاۋسىز وسۋىنە جانە ەلەكتر ستانسيالارىنداعى اپاتتىق جاعدايلارعا بايلانىستى 2021 -جىلعى ماۋسىمنان باستاپ تاپشىلىق پايدا بولدى. ول رەسەي فەدەراتسياسىنان شامامەن 300 ميلليون كۆت س ا ع كولەمىندە تەرىس سالدو- اعىن ەسەبىنەن جابىلدى. 2022 -جىلعا ەلەكتر ەنەرگياسىن ءوندىرۋ جوسپارى - 114,4 ميلليارد كۆت ساعات»، - دەدى ول مينيسترلىكتىڭ كەڭەيتىلگەن القا وتىرىسىندا.

ونىڭ اتاپ وتۋىنشە، ەلەكتر ەنەرگياسى مەن قۋاتىنىڭ تاپشىلىعىن بولدىرماۋ ماقساتىندا 2021 -جىلعى قاراشادا جامبىل گرەس- ءىنىڭ 3- ءشى، ال 2022 -جىلعى قاڭتاردا 4- ەنەرگيا بلوگى ىسكە قوسىلدى. بۇل جيىنتىعىندا گرەس جۇكتەمەسىن 330 مۆت- قا ۇلعايتۋعا مۇمكىندىك بەردى.

«سونداي- اق، ورتالىقتاندىرىلعان ساۋدا- ساتتىقتا ەلەكتر ەنەرگياسىنىڭ تاپشىلىعى مەن جوسپارلى يمپورتى كەزىندە ماينەرلەردى شەكتەۋ تەتىكتەرى ەنگىزىلدى. جالپى، قازىرگى ۋاقىتتا زاڭسىز سيفرلىق ماينينگ سۋبەكتىلەرىن انىقتاۋ بويىنشا جۇمىس جالعاسۋدا. وسى سۋبەكتىلەردى ودان ءارى رەتتەۋ اياسىندا كەلەسى ماسەلەلەر پىسىقتالۋدا: سيفرلىق ماينينگ قىزمەتىن ليتسەنزيالاۋدى ەنگىزۋدى جانە سيفرلىق ماينينگ سۋبەكتىلەرىنىڭ ەلەكتر ەنەرگياسىن تۇتىنۋىنا كۆوتالاردى ايقىنداۋدى كوزدەيتىن زاڭناماعا تۇزەتۋلەردى ەنگىزۋ؛ جاڭا ماينەرلەر ءۇشىن قۋاتتاردى قوسۋعا موراتوري ەنگىزۋ؛ سيفرلىق ماينينگ سۋبەكتىلەرىن ەلەكتر ەنەرگياسىن جاڭارتىلاتىن ەنەرگيا كوزدەرىنەن جانە يمپورتتان تۇتىنۋعا اۋىستىرۋ»، - دەدى بولات اقشولاقوۆ.

اۆتور: مارلان جيەمباي