قازاقستان بيىل قانشا توننا مۇناي وندىرەدى

بۇل تۋرالى ق ر ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«2021-جىلدىڭ قورىتىندىسى بويىنشا مۇناي ءوندىرۋ كولەمى 85,9 ميلليون توننانى، مۇناي ەكسپورتى 67,6 ميلليون توننانى قۇرادى. مۇناي ءوندىرۋدىڭ 2022-جىلعا ارنالعان جوسپارى - 87,5 ميلليون توننا، ەكسپورت بويىنشا - 69 ميلليون توننا. تەڭىز، قاراشىعاناق جانە قاشاعان ءۇش ءىرى مۇناي-گاز جوباسى ەلىمىزدىڭ مۇناي ءوندىرۋ كوشباسشىلارى بولىپ قالۋدا»، - دەدى ول مينيسترلىكتىڭ كەڭەيتىلگەن القا وتىرىسىندا.

ونىڭ اتاپ وتۋىنشە، تەڭىز جوباسىندا 2021-جىلى مۇناي ءوندىرۋ 26,5 ميلليون توننانى، گاز ءوندىرۋ كولەمى 14,5 ميلليارد تەكشە مەتردى قۇرادى.

«كەن ورنىندا قۇنى 45,2 ميلليارد ا ق ش دوللارىن قۇرايتىن كەلەشەكتە كەڭەيتۋ جوباسى ىسكە اسىرىلۋدا. بۇل مۇناي ءوندىرۋدى جىلىنا 12 ميلليون تونناعا ۇلعايتۋعا مۇمكىندىك بەرەدى. 2021-جىلدىڭ قورىتىندىسىنا سايكەس جوبا بويىنشا جۇمىستاردىڭ جالپى ىلگەرىلەۋى 89 پايىزدى، 2022-جىلعا ارنالعان جوسپار 97,4 پايىزدى قۇرادى. جوبانى 2023-جىلى اياقتاۋ جوسپارلانىپ وتىر»، - دەدى مينيستر.

بولات اقشولاقوۆتىڭ ايتۋىنشا، 2021-جىلدىڭ قورىتىندىسىندا قاشاعاندا مۇناي ءوندىرۋ كولەمى 16,2 ميلليون توننا، ال گاز ءوندىرۋ كولەمى 9,8 ميلليارد تەكشە مەتر بولدى.

«وتكەن جىلى قۋاتى 1 ميلليارد تەكشە بولاتىن گاز وڭدەۋ زاۋىتىنىڭ قۇرىلىسى باستالدى. 2022-جىلى وسى گاز وڭدەۋ زاۋىتىنىڭ قۇرىلىس-مونتاجداۋ جۇمىستارىندا 40 پايىز پروگرەسكە قول جەتكىزۋ جوسپارلانىپ وتىر. تولىق قۋاتقا شىققان كەزدە زاۋىت 800 ميلليون تەكشە كولەمىندە تاۋارلىق گاز، 119 مىڭ توننا كولەمىندە سۇيىتىلعان گاز وندىرەتىن بولادى. سونىمەن قاتار قۋاتى جىلىنا 2 ميلليارد تەكشە مەتر قاشاعان گاز وڭدەۋ زاۋىتى جوباسىن ىسكە اسىرۋ جوسپارلانۋدا»، - دەگەن ول.

وسى ورايدا مينيستر ءبىرىنشى ۆيتسە-مينيستر مۇرات جورەبەكوۆكە وسى جىلى بازالىق جوبالاۋدى باستاۋ جونىندە تاپسىرما بەردى.

«قاراشىعاناقتا 11,5 ميلليون توننا كولەمىندە مۇناي، 18,9 ميلليارد تەكشە مەتر كولەمىندە گاز ءوندىرىلدى. بۇگىنگى كۇنى كەن ورنىندا سۇيىق كومىرسۋتەكتەردى ءوندىرۋ دەڭگەيىن جىلىنا 11-12 ميلليون توننا شەگىندە ۇستاپ تۇرۋ بويىنشا جوبالار ىسكە اسىرىلۋدا. بىرىنشىدەن، 2021-جىلى قۇنى 1,1 ميلليون ا ق ش دوللارىنا گاز وڭدەۋ قۋاتىن ارتتىرۋ جوباسى ىسكە قوسىلدى. ەكىنشىدەن، قۇنى 578 ميلليون ا ق ش دوللارىنا گازدى كەرى ايداۋ 4-كومپرەسسورىن پايدالانۋعا بەرۋ ءۇشىن ىسكە قوسۋ-جوندەۋ جۇمىستارى جۇرگىزىلۋدە. ۇشىنشىدەن، شيكى گازدى كەرى ايداۋدىڭ 5-كومپرەسسورىن سالۋ جۇمىستارى باستالدى. جوبانىڭ بيۋجەتى - 970 ميلليون ا ق ش دوللارى. اياقتالۋ مەرزىمى - 2025 جىل»، - دەدى بولات اقشولاقوۆ.