لۋكاشەنكو: پۋتين زەلەنسكيگە وتە جاقسى ۇسىنىس جاساپ وتىر

نۇر-سۇلتان. قازاقپارات - بەلارۋس پرەزيدەنتى الەكساندر لۋكاشەنكو جاپون تەلەارناسىنا سۇحبات بەرىپ، ۋكراينا پرەزيدەنتى ۆ. زەلەنسكيگە ەسكەرتۋ ايتتى.

ەگەر ەسكەرتۋدى ورىنداماسا، ۋكراينانىڭ تۇبىنە جەتەدى دەدى. بۇل جايلى بەلتا ا ا جازدى.

ونىڭ ايتۋىنشا، ر ف پرەزيدەنتى ۆ. پۋتين ۋكراينا پرەزيدەنتى ۆ. زەلەنسكيگە سوعىستى بەيبىت اياقتاۋدىڭ جاپ-جاقسى، ءتيىمدى ۇسىنىسىن ايتىپ وتىرعان كورىنەدى.

«پۋتين زەلەنسكيگە وتە جاقسى ۇسىنىس جاساپ، كەلىسىمگە كەلۋدىڭ ءتيىمدى جولىن ۇسىنىپ وتىر. وعان كۇمانىم جوق. زەلەنسكي اقىلعا كەلىپ، پۋتينمەن كەلىسسە، سوعىس بەيبىت اياقتالادى. وعان ءسوز بەرەم. زەلەنسكيدىڭ كەلىسىمگە كەلۋىنە ءالى دە كەش ەمەس»، - دەدى بەلارۋس پرەزيدەنتى جاپون ارناسىنا.

لۋكاشەنكو بۇل سوعىستا كىمنىڭ جەڭەتىنىن ءبىلىپ وتىر.

«رەسەي بۇل سوعىستا ءبارىبىر جەڭىپ شىعادى. وعان 100 پايىز سەنىمدىمىن. ەگەر زەلەنسكي قازىر كەلىسىمگە كەلمەي قىرسىعا بەرسە، اقىر سوڭىندا كاپيتۋلياتسياعا ءتۇسىپ، قارۋىن تاستاپ، جەڭىلگەنىن مويىنداۋىنا تۋرا كەلەدى. ونداي ماسقارا ەشكىمگە دە كەرەك ەمەس. ال جەڭگەن تاراپ نە ىستەسە دە ءوز ەركى. وندايدى جاپوندار جاقسى بىلەسىڭدەر...»، - دەپ ءسوزىن تۇيىندەدى بەلارۋس باسشىسى.

سونداي- اق ءسوز بارىسىندا لۋكاشەنكو بۇل سوعىسقا ارالاسپايتىنىن كەسىپ ايتتى.

«باتىس ءبىزدى ارانداتىپ، سوعىسقا ارالاسقان ەل ەتىپ كورسەتۋگە تىرىسىپ باعۋدا. بىردەن ايتايىن، مۇنىسىنان دانەمە شىقپايدى. ءبىز بۇل كيكىلجىڭگە ارالاسپايمىز»، - دەيدى لۋكاشەنكو.