جارىققا قاراعاندا كوزىڭىز اۋىرا ما؟
جەڭىل تۇرىندە جارىق وتە اشىق كورىنەدى، سوندىقتان كوزىڭىزدى قىسا تۇسەسىز. اۋىر تۇرىندە ول كادىمگىدەي اشۋىڭىزعا تيەدى، كەيدە، ءتىپتى، اۋىرتادى. بۇل سەزىمتالدىقپەن بايلانىستى كەي سەبەپتەر ۋاقىت وتە كوز نەمەسە كورۋ پروبلەمالارىنا اكەلۋى مۇمكىن. سوندىقتان وعان ءمان بەرمەي جۇرە بەرۋگە بولمايدى. ونىڭ سەبەبىن انىقتاپ، ۋاقىتىندا دارىگەرگە كورىنۋ ماڭىزدى. جارىقتان قورقۋدىڭ ءجيى كەزدەسەتىن سەبەپتەرىن ۇسىنامىز.
كوز قۇرعاقتىعى
جارىققا سەزىمتالدىقتىڭ كەڭ تاراعان سەبەبىنە كوز قۇرعاقتىعى جاتادى. كوز قۇرعاقتىعى كەزىندە قىشۋ، قىزارۋ، باس اۋرۋىمەن جانە كوزدىڭ بۇلدىراۋىمەن قاتار جۇرەتىن جارىققا سەزىمتالدىق بولادى. بۇل جاعدايدا كوز ىلعال بولىپ قالۋ ءۇشىن جەتكىلىكتى جاس وندىرمەيدى. كوز قۇرعاقتىعىمەن كۇرەسۋگە ارنايى ءدارى-دارمەكتەر كومەكتەسەدى. ەگەر قۇرعاقتىقتىڭ سەبەبى قوسالقى اۋرۋلار بولسا، دارىگەر تامشىلار نەمەسە قابىنۋعا قارسى قۇرالدار جازىپ بەرەدى.
اللەرگيالىق كونيۋنكتيۆيت
بۇل جاعداي كونيۋنكتيۆانى — كوزدى جانە قاباقتىڭ ىشكى بولىگىن قاپتاپ تۇراتىن جىڭىشكە مەمبرانانى بىردەڭە تىتىركەندىرگەندە پايدا بولادى. ءبىزدىڭ اعزامىز اللەرگەنگە، مىسالى، شاڭ، شاڭ-توزاڭ كەنەسى، زەڭ نەمەسە جانۋارلار جۇنىنە اسەر بەرگەندە كونيۋنكتيۆيتتىڭ اللەرگيالىق ءتۇرى پايدا بولۋى مۇمكىن. ەگەر سىزدە اللەرگيالىق كونيۋنكتيۆيت بولسا، دارىگەر مۇمكىندىگىنشە اللەرگەننەن الشاق بولۋدى ۇسىنادى. سونداي-اق جاعىمسىز بەلگىلەردى باسۋعا كومەكتەسەتىن انتيگيستاميندىك ءدارى-دارمەك جازىپ بەرەدى.
كوزدىڭ شارشاۋى
شامادان تىس كۇش تۇسكەندە كوز شارشايدى. ادەتتە، ۇزاق ۋاقىت بويى ءبىر جەرگە زەيىن قويۋ قاجەت بولعاندا، مىسالى، كولىك ايداعاندا نەمەسە كومپيۋتەردە جۇمىس ىستەگەندە كوز شارشايدى. ونىڭ بەلگىلەرى ادام دەمالعاننان كەيىن كەتەدى. كوزدىڭ بۇلاي شارشاۋىنىڭ الدىن الۋ ءۇشىن كومپيۋتەر نەمەسە سمارتفون الدىندا ۇزاق وتىرماڭىز، جۇمىس بارىسىندا جوسپارلانعان ۇزىلىستەر جاساڭىز جانە قۇرىلعى جارىعىن وزگەرتۋدى جانە ءماتىن ولشەمىن ۇلكەيتۋدى ۇمىتپاڭىز. ەگەر كوزىڭىزدىڭ تەز شارشايتىنىن بايقاساڭىز، كوزگە ارنالعان جاتتىعۋلار جاساڭىز.
باس ساقيناسى
جارىققا سەزىمتالدىقتىڭ تاعى ءبىر سەبەبى - باس ساقيناسى. بۇل ورتاشا نەمەسە قاتتى باس اۋرۋىن شاقىراتىن نيەۆرولوگيالىق جاعداي. باس ساقيناسى اراسىندا پايدا بولۋى نەمەسە سوزىلمالى تۇرگە (ايىنا شامامەن 15 كۇن قاتارىنان اۋىرۋ) اينالۋى مۇمكىن. باس ساقيناسى كەزىندە جارىققا قاراساڭىز كوزىڭىز اۋىرادى جانە باس اۋرۋى ودان سايىن كۇشەيۋى مۇمكىن. بۇل اۋرۋمەن قينالاتىن ادامداردا جەلكە بولىگىندە — جارىقتى جانە باسقا دا ۆيزۋالدى بەلگىلەردى تۇسىندىرەتىن مي ايماعىندا جوعارى بەلسەندىلىك بايقالادى. بۇل ءوز كەزەگىندە، جارىققا سەزىمتالدىقتى ارتتىرادى.
كوزدىڭ مۇيىزگەك قابىعىنىڭ زاقىمدالۋى
كوزدىڭ نازىك ءتىنىن قانداي دا ءبىر قاتتى زات، مىسالى، شاڭ، لاستىق نەمەسە قۇم جاراقاتتاسا دا، جارىققا قاراعاندا كوزىڭىز اۋىرۋى مۇمكىن. سونىمەن قاتار، ول كەزدە كوزىڭىزدە باسقا بىردەڭە تۇرعانداي سەزىم بولادى، كوز قىزارۋى، جاس اعۋى جانە باس اۋىرۋى مۇمكىن.
ۋۆەيت
ۋۆەيت — كوز تىندەرى بۇزىلۋىن نەمەسە ءىسىنۋىن شاقىرۋى مۇمكىن قابىنۋ اۋرۋلارى توپتارىن سيپاتتاۋعا قولدانىلاتىن تەرمين. ۋۆەيت قابىنۋ سەبەبىنەن پايدا بولادى. ونىڭ سەبەبى كوز جۇقپاسى بولۋى مۇمكىن. سونداي-اق، ۋۆەيت تەڭگە قوتىر (پسورياز)، ۇمىتشاقتىق (سكلەروز) نەمەسە ويىق جارالى كوليت سەكىلدى قابىنۋ اۋرۋلارىنىڭ سەبەبىنەن پايدا بولادى. ادەتتە، ونىڭ بەلگىلەرى جىلدام پايدا بولادى: جارىققا سەزىمتالدىق، دۇرىس كورمەۋ، كوزدىڭ اۋىرۋى جانە قىزارۋى.
كەي ءدارى- دارمەك
جارىققا سەزىمتالدىق كەي دارىلەردىڭ جاناما اسەرى بولۋى مۇمكىن. مىسالى: قابىنۋعا قارسى ستەرويدتى ەمەس دارىلەر، اللەرگياعا جانە بەزەۋگە قارسى دارىلەر، انتيبيوتيكتەر، نەسەپ ايداعىش قۇرالدار.
ميدىڭ شايقالۋى
ميدىڭ شايقالۋى — ادەتتە، باستى سوققان كەزدە پايدا بولاتىن باس سۇيەك- مي زاقىمىنىڭ ءبىر ءتۇرى. بۇل جاعدايدا جارىققا سەزىمتالدىق كوبىنە باس اۋرۋىمەن قاتار جۇرەدى. مي شايقالۋىنىڭ باسقا سەبەپتەرىنە باس اينالۋ، جۇرەك اينۋ، زەيىن قويۋ، ەستە ساقتاۋ جانە ۇيقى پروبلەمالارىنىڭ بولۋى جاتادى.
ەنتسەفاليت نەمەسە مەنينگيت
ەنتسەفاليت — مي ءتىنىنىڭ قابىنۋى، ال مەنينگيت — باس ميىنىڭ بەتكى قابىقشاسىنىڭ قابىنۋى. بۇل ەكى اۋرۋدى دا ۆيرۋستار، باكتەريالار جانە ساڭىراۋقۇلاقتار شاقىرادى. كەي جاعدايدا ەنتسەفاليت تە، مەنينگيت تە ءبىرۋاقىتتا پايدا بولادى. كەيدە بۇل اۋرۋلار جەڭىل وتەدى: تەك جارىققا سەزىمتالدىق پەن باس اۋرۋى عانا بولادى. ال اۋىر تۇرىندە ولار ادام ومىرىنە قاۋىپ توندىرەدى.
massaget.kz
