ءبىر عاسىردان كەيىن تابىلعان كەمە - فوتو

Nationalgeographic.kz ەستەر حورۆاتتىڭ تۇڭعيىقتان تۇسىرگەن سول تاريحي سۋرەتتەرىن جانە nationalgeographic.com اۆتورى سيمون ۋوررالدىڭ (Simon Worral) كەمە تۋرالى ماتەريالىنان قىسقاشا ماعلۇمات ۇسىندى، دەپ حابارلايدى قازاقپارات Nationalgeographic.kz سايتىنا سىلتەمە جاساپ.

اعىلشىن- يرلاندىق زەرتتەۋشى ەرنەست شەكلتون باستاعان ەكسپەديتسيا مىنگەن «Endurance» اتتى كەمە ساپارعا 1914 -جىلى جەلوقساندا وڭتۇستىك گەورگيادان شىققان. ماقساتى - وڭتۇستىك پوليۋسكە جەتۋدى كوزدەگەن شەكلتون باستاعان زەرتتەۋشىلەردى انتاركتيدا جاعالاۋىنا جەتكىزۋ. الايدا كەمە 1915 -جىلى قاراشادا ۋەددەل تەڭىزىندە مۇز قۇرساۋىنا ءتۇسىپ، كۇيرەگەن. كەمە باتىپ بارا جاتقاندا مۇزعا شىعىپ ۇلگەرگەن ەكسپەديتسيانىڭ 28 مۇشەسىنىڭ اۋپىرىمدەپ ءجۇرىپ امان قالعانى ءوز الدىنا ءبىر حيكايا.

ءبىر قىزىعى، كەمە باتقان تۇس شامامەن بەلگىلى بولعانىمەن، ونى ىزدەۋ جۇمىستارى ناتيجە بەرمەگەن ەدى. ەندى مىنە، 1 عاسىردان استام ۋاقىت وتكەندە Endurance22 ەكسپەديتسياسى عاسىر جۇمباعىنا اينالعان كەمەنى انتاركتيدانىڭ تۇسىنان، ۋەددەلل تەڭىزىنىڭ تۇبىنەن تاۋىپ وتىر. كەمەنىڭ العاشقى كەسكىندەرى 5-ناۋرىزدا اۆتونومدى سۇڭگۋىر اپپاراتى ارقىلى 2 ميل شاماسىنداعى تەرەڭدىكتەن انىقتالعان.

كەمەنىڭ Endurance ەكەندىگىنە ەشقانداي كۇمان جوق، ويتكەنى وتە تومەن تەمپەراتۋرا، وتتەگىنىڭ ازدىعى جانە كۇن ساۋلەسىنىڭ جوقتىعى ونىڭ جاقسى ساقتالۋىنا سەپتىگىن تيگىزگەن. فوتودا ونىڭ اتاۋى دا انىق كورىنىپ تۇر. عالىمدار كەمەنىڭ باتقان ورنى بەلگىلى بولا تۇرا، ۇزاق ۋاقىت بويى تابىلماۋىنىڭ سەبەبى ونىڭ قۇرساۋعا تۇسكەننەن كەيىن دە مۇزدىڭ اعىسىمەن باستاپقى ورنىنان جىلجىپ كەتكەندىگىنەن دەيدى.