اقتوبە اۋەجايى ون كۇنگە جابىلدى
ءاليا مولداعۇلوۆا اۋەجايىنىڭ اكىمشىلىگى الەۋەتتىك جەلىدەگى پاراقشاسى ارقىلى حابارلاندىرۋ تاراتتى. وندا اۋەجايدىڭ 10 كۇن بويى جابىق بولاتىنى ەسكەرتىلگەن.
«اۋەجايدىڭ 17-27-ناۋرىز كۇندەرى ارالىعىندا جوندەۋگە جابىلاتىنىن حابارلايمىز. بيلەتتەردى قايتارۋ نەمەسە قايتا برونداۋ سۇراقتارى بويىنشا ساتىپ الۋ ورىندارىنا جۇگىنۋدى سۇرايمىز. قازىرگى جاعداي ءۇشىن كەشىرىم سۇرايمىز»، - دەپ جازىلعان پاراقشادا.
ايتا كەتەيىك، ازاماتتىق اۆياتسيا كوميتەتى اۋە ايلاعىنىڭ 17-ناۋرىزدان باستاپ جابىلاتىنىن مالىمدەگەن ەدى. وبلىس اكىمدىگى نىساندا ەكى اپتا جوندەۋ جۇرگىزىلەتىنىن ايتتى. كەيىن كۇندىز جوندەۋ جۇرگىزىلىپ، تۇندە ۇشۋعا رۇقسات بەرىلەتىنى جاريالاندى. ال 12-ناۋرىزدا ۇشىپ- قونۋ جولاعىندا جوندەۋ جۇمىستارىن جۇرگىزۋ بارىسىندا جالداپ الىنعان ارنايى تەحنيكا ىستەن شىققانى، سول سەبەپتى بىرنەشە رەيستەر كەشىكتىرىلگەنى ءمالىم ەتىلدى. بۇگىنگى حابارلاماعا سايكەس، اۋەجاي مۇلدەم جابىلادى.
