كۇتپەگەن توسىن سىي: سەمەيلىكتەردىڭ اباي وبلىسى قۇرىلاتىنىن العاش ەستىگەن ءساتى
پرەزيدەنتتىڭ وسى سوزدەردى ايتقان ساتىندە ورىندارىنان اتىپ تۇرىپ، ءبىر-ءبىرىن قۇشاقتاپ، قۇتتىقتاپ جاتقان تۇرعىنداردىڭ بەينەجازباسى بۇعان دالەل.
سونداعى العاشقى قاتاردا وتىرعان قازاقستان جازۋشىلار وداعى سەمەي قالالىق فيليالىنىڭ ءتوراعاسى مەرەي قارت قازاقپارات تىلشىسىنە جان سارايىن جادىراتقان جاڭالىقتى ەستىگەندەگى العاشقى اسەرىن ءبولىستى.
«اباي وبلىسىنىڭ قۇرىلۋى بىزگە كۇتپەگەن توسىن سىي بولدى. مۇقىم قالا جۇرتشىلىعى بوركىمىزدى اسپانعا اتىپ قۋانىپ جاتىرمىز. ەڭ العاش ەستىگەن ساتتە ءوزىمدى قويارعا جەر تاپپاي، توبەم كوككە جەتتى. مەملەكەت باسشىسى قاسىم جومارت-توقايەۆ بىلتىر ابايدىڭ 175 جىلدىعىندا «اباي ۇلدارىمەن» اتتى ەسكەرتكىشتىڭ اشىلۋ راسىمىنە قاتىسقان بولاتىن. سوندا پرەزيدەنت ءوز سوزىندە سەمەيدىڭ تاريحي، مادەني ستاتۋسى بولۋ كەرەكتىگىن ايتقان ەدى. مىنە، بۇگىن سونىڭ نۇكتەسى قويىلىپ وتىر»، - دەدى مەرەي قارت.
ونىڭ ايتۋىنشا، اباي، شاكارىم مەن مۇحتاردى دۇنيەگە اكەلگەن قاسيەتتى جەردىڭ وسىعان دەيىن ەكونوميكالىق-الەۋمەتتىك تۇرعىدا جاعدايى ناشارلاپ، حالقىنىڭ تۇرمىسى تومەندەپ كەتكەن.
«سەمەيلىكتەر بۇل جاڭالىقتى كوپتەن كۇتتى. دەسە دە يگىلىكتىڭ ەرتە-كەشى جوق. ەندى قايتادان شاھارعا جان ءبىتىپ، تىرشىلىگى قىج-قىج قاينايدى دەپ سەنەمىن. الەۋمەتتىك نىساندار جوندەۋدەن ءوتىپ، مادەني ورتالىقتار اشىلىپ، جۇرتتىڭ جاعدايى تۇزەلسە دەيمىز. باسقا وبلىستارمەن تەرەزەمىز تەڭ بولىپ، مول قاراجات بولىنسە قۇبا-قۇپ. كوشەلەر، جولدار جوندەلىپ، قوردالانعان باسقا دا ماسەلەلەر شەشىمىن تاپسا دەگەن تىلەكتەمىز»، - دەدى قازاقستان جازۋشىلار وداعى سەمەي قالالىق فيليالىنىڭ ءتوراعاسى.
ءوز سوزىندە ول سەمەيدىڭ باتىس وڭىرلەرى سەكىلدى مۇناي ەمەس، قاراعاندى وبلىسى سياقتى كومىر ەمەس، ادام كاپيتالىن شىعارىپ وتىرعانىن جەتكىزدى.
«كەيبىرەۋلەر سەمەيدە بولاشاق جوق، سوندىقتان باسقا جاققا كوشۋ كەرەك دەگەندى ايتىپ ءجۇردى. مەنىڭ ولارعا ايتارىم - كەزىندە الاش پارتياسى بولماسا قازىر ەلوردا مەن الماتىدا جۇرگەن جاستاردىڭ بولاشاعى بولمايتىن ەدى»، - دەدى مەرەي قارت.
