قازاقستان مەن موڭعوليا اراسىندا تىكەلەي اۋە رەيسى اشىلدى
الماتى. قازاقپارات - الماتى قالاسى اۋەجايىندا موڭعوليانىڭ «حۋننۋ ەير» اۋە كومپانياسىنىڭ الماتى - ۇلان- باتىر باعىتىنداعى جاڭا حالىقارالىق رەيسىنىڭ اشىلۋىنا ارنالعان سالتاناتتى شارا ءوتتى، دەپ حابارلايدى قازاقپارات.
ءىس- شاراعا موڭعوليانىڭ قازاقستانداعى توتەنشە جانە وكىلەتتى ەلشىسى د. بايارحۋۋ، موڭعوليا ازاماتتىق اۆياتسيا باس باسقارماسىنىڭ اۋە كولىگىن رەتتەۋ جانە ساياسات دەپارتامەنتىنىڭ ديرەكتورى گ. باتبايار، موڭعوليا ازاماتتىق اۆياتسيا دەپارتامەنتىنىڭ اەروناۆيگاتسيا جانە اۋەجاي ءبولىمىنىڭ ديرەكتورى چ. ودگەرەل، «حۋننۋ ەير» اۋە كومپانياسى ديرەكتورى پ. مونحجارگال، ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ ءتوراعاسى ت. لاستايەۆ، الماتى قالاسى اكىمدىگىنىڭ باسشىلىعى قاتىستى.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، ۇلان- باتىر - الماتى - ۇلان- باتىر باعىتىنداعى رەيستەر اپتاسىنا ءبىر رەت، سارسەنبى كۇندەرى 98 ورىندىق ە-190 اۋە كەمەسىمەن ورىندالادى. رەيستەردىڭ اشىلۋى ەكى ەل ازاماتتارىنا قازاقستان مەن موڭعوليا اراسىندا كەدەرگىسىز ساياحاتتاۋعا، سونداي- اق ساۋدا- ەكونوميكالىق، تۋريزم مەن ىسكەرلىك ارىپتەستىكتى دامىتۋعا ىقپال ەتەدى.
