پرەزيدەنت ۇلتتىق مۇددەگە، حالىققا دەگەن ادالدىعىن كورسەتتى - ۇلىقبەك ەسداۋلەت

الماتى. قازاقپارات - پرەزيدەنتتىڭ بيىلعى جولداۋى ەرەكشە بولدى. بۇرىن جابىلىپ قالعان وبلىستاردى قايتا قۇرۋ تۋرالى شەشىمى حالىقتىڭ كوڭىلىن كوتەرىپ، رۋحتاندىرىپ جىبەردى.

مۇنداي پىكىردى اقىن، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت ءبىلدىردى، دەپ حابارلايدى قازاقپارات ءتىلشىسى.

«پرەزيدەنتتىڭ بيىلعى جولداۋى ەرەكشە بولدى. بۇرىن جابىلىپ قالعان وبلىستاردى قايتا قۇرۋ تۋرالى شەشىمى حالىقتىڭ كوڭىلىن كوتەرىپ، رۋحتاندىرىپ جىبەردى. سەمەيدى - اباي، تالدىقورعاندى - جەتىسۋ، جەزقازعاندى - ۇلىتاۋ، الماتى وبلىسىنىڭ ورتالىعىنا د. قونايەۆتىڭ اتىن بەرۋدى ۇسىندى. مەن بۇل ۇلكەن قادام جانە جاقسى جاڭالىق بولدى دەپ ويلايمىن. مەملەكەت باسشىسى تۇرعىنداردىڭ كوكەيىندە جۇرگەن الۋان ءتۇرلى ساۋالعا جاۋاپ بەردى»، - دەيدى اقىن.

سونىمەن قاتار، ول پرەزيدەنتتىڭ قازاقستان حالقىنا جولداۋىن ىسكە اسىرۋ ءۇشىن كونستيتۋتسياعا 30-دان استام وزگەرىس ەنگىزىلەتىنىن تىلگە تيەك ەتتى.

«كونستيتۋتسياعا 30-دان استام وزگەرىس ەنگىزىلەتىن بولدى. بۇل دا باتىل قادام. سونىڭ ىشىندە تىلگە قاتىستى زاڭ قابىلدانسا ەكەن دەگەن تىلەك بار. پرەزيدەنت قاسىم- جومارت توقايەۆ ۇلتتىق مۇددەگە، حالىققا دەگەن ادالدىعىن تاعى ءبىر مارتە كورسەتتى. قايتالاپ ايتام، مەملەكەت باسشىسىنىڭ بۇگىنگى جولداۋى حالىقتىڭ ەڭسەسىن كوتەرىپ، قازاقستاننىڭ دامۋىنا ۇلەس قوسۋعا دەگەن قۇلشىنىسىن وياتتى»، - دەيدى قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت .

اۆتور: الما مۇقانوۆا