شىعىس قازاقستان مەن الماتى وبلىسىنىڭ اكىمدەرى وبلىستارىنىڭ بولىنۋىنە قاتىستى پىكىر ءبىلدىردى

نۇر-سۇلتان. قازاقپارات - شىعىس قازاقستان وبلىسىنىڭ اكىمى دانيال احمەتوۆ پرەزيدەنت قاسىم- جومارت توقايەۆتىڭ اباي وبلىسىن قۇرۋ تۋرالى ۇسىنىسىنا قاتىستى پىكىر ءبىلدىردى.

«بۇل وتە جاقسى باستاما، تاعى نە ايتا الامىن. ەندى ەكى وبلىس بولادى. حالىققا جاقسى، بىزگە دە جاقسى»، - دەدى دانيال احمەتوۆ پارلامەنت پالاتالارىنىڭ بىرلەسكەن وتىرىسىنان كەيىن جۋرناليستەردىڭ سۇراقتارىنا جاۋاپ بەرىپ.

بۇل تۋرالى Tengrinews.kz حابارلاعان بولاتىن .

بۇعان دەيىن پرەزيدەنت قاسىم-جومارت توقايەۆ سەمەي ايماعىندا اباي وبلىسىن قۇرۋدى ۇسىنعان ەدى.

«سەمەي ايماعىندا اباي وبلىسىن قۇرۋدى ۇسىنامىن. سەمەي قالاسى جاڭا وبلىستىڭ ورتالىعى بولادى. وسى ماسەلەنى ايماق تۇرعىندارى كوپتەن بەرى ايتىپ جۇرگەنىن بىلەمىن. قازىر ول جاقتا شەشىمىن تاپپاعان تۇيتكىلدەر از ەمەس. مىسالى، ايماقتىڭ ىشكى ينفراقۇرىلىمى ابدەن توزعان»، - دەدى توقايەۆ.

الماتى وبلىسىنىڭ اكىمى قانات بوزىمبايەۆتا ءوڭىردىڭ الماتى جانە جەتىسۋ وبلىستارىنا بولىنۋىنە قاتىستى پىكىر ءبىلدىردى.

جۋرناليستەر اكىمنەن ەكى وبلىستىڭ بيۋدجەتى قالاي بولىنەتىنى تۋرالى سۇرادى.

«ءبولۋ كوميسسياسى بولۋى مۇمكىن، وبلىستا قۇرىلعان شەكارالاردا باسشىلار تاعايىندالادى، ادەتتە وسىلاي جاسالادى. بۇگىن مەملەكەت باسشىسى ءبىرىنشى جارتىجىلدىقتىڭ اياعىندا بارلىعى بىتەتىنىن، ودان دا تەزىرەك بولۋى مۇمكىن ەكەنىن ايتتى»، - دەپ جاۋاپ بەردى بوزىمبايەۆ.

بوزىمبايەۆ ءوڭىردىڭ ءبولىنۋى ءوزى ءۇشىن دە جاڭالىق بولعانىن جەتكىزدى. ونىڭ ايتۋىنشا، بۇل ايماقتى باسقارۋ تۇرعىسىنان وڭايىراق بولادى.

«پرەزيدەنت ءوڭىر ەكى بولىككە بولىنسە، باسقارۋ تۇرعىسىنان ىڭعايلى بولاتىنىن ناقتى ايتتى. اگلومەراتسيا ۇلكەن رول اتقارادى، ول جاقسى ۇيىمداستىرىلماعان. بۇگىندە الماتى وبلىسىنىڭ اۋماعىندا 215 مىڭ ادام باۋ- باقشا القاپتارىندا، ساياجايلاردا تۇرادى. شىن مانىندە، ولاردا قاراپايىم كوممۋنالدى قىزمەتتەر جوق. بولعان كۇننىڭ وزىندە قىمبات جانە ت. ب. شىن مانىندە، بۇل جۇمىستى جۇرگىزۋ كەرەك، ول ينۆەستيتسيانى قاجەت ەتەدى. ءتارتىپ ورناتۋ كەرەك. باس جوسپاردى وزگەرتۋ قاجەت. بۇل - ۇلكەن جۇمىس»، - دەپ جاۋاپ بەردى ول.

قانات بوزىمبايەۆ الماتى وبلىسىنىڭ اكىمى لاۋازىمىندا قالا ما دەگەن سۇراققا جاۋاپ بەردى.

«مەن مۇنى شەشپەيمىن. جالپى، قالامىن با، جوق پا، ونى دا شەشپەيمىن»، - دەدى اكىم.

ءوڭىر اكىمى قاپشاعاي قالاسىنىڭ اتاۋىن قونايەۆ دەپ وزگەرتۋدى قولدايتىنىن دا مالىمدەدى.

«دىنمۇحامەد احمەت ۇلىنىڭ كەزىندە بۇل قالانىڭ نەگىزى قالانىپ، سالىندى. ونى جەكە ءوزىم قولدايمىن. بۇل قالا اتا-بابالارىم عاسىرلار بويى ءومىر سۇرگەن اۋماقتا ورنالاسقان، سوندىقتان ونى قولدايمىن. بۇل جەردى قاستەرلەيمىن. مەنىڭ ويىمشا، ديماش احمەت ۇلىنىڭ ەسىمى الماتى وبلىسى تۇرعىندارىنىڭ ەسىندە جاقسى ساقتالعان»، - دەدى قانات بوزىمبايەۆ.

بوزىمبايەۆ ءوڭىردى ءبولۋ ءۇشىن قوسىمشا قاراجات ءبولۋ قاجەت ەمەس ەكەنىن اتاپ ءوتتى.