پرەزيدەنت: ساتقىنداردىڭ وپاسىزدىعى قۇقىق قورعاۋ ورگاندارىنىڭ بەدەلىنە نۇقسان كەلتىرمەۋگە ءتيىس

None
None
نۇر-سۇلتان. قازاقپارات - قاڭتار وقيعالارى مەملەكەتتىلىگىمىز ءۇشىن زور سىناق بولدى.

بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋى بارىسىندا ءمالىم ەتتى، دەپ حابارلايدى قازاقپارات ءتىلشىسى.

پرەزيدەنت قاڭتار وقيعاسى كەزىندە بىتىمگەرشىلىك كۇشتەرى ەلىمىزدە بىردە-ءبىر وق اتپاعانىن اتاپ ءوتتى.

«ستراتەگيالىق نىسانداردىڭ قاۋىپسىزدىگىن عانا قامتاماسىز ەتتى. بۇعان الدىن الا جاسالعان كەلىسىمنىڭ ناتيجەسىندە قول جەتكىزدىك. جاعداي تۇراقتانعان سوڭ، ەكى اپتادان كەيىن ولار قازاقستاننان تولىق شىعارىلدى. بۇل - كوپتاراپتى قارۋلى كونتينگەنت، ونىڭ قۇرامىندا قازاقستان دا بار. بىتىمگەرشىلىك ميسسياسىنىڭ ماڭىزدى ءرولىن جوققا شىعارۋعا بولمايدى. ءبىراق، تۇپتەپ كەلگەندە، ءبىز سودىرلاردى ءوز كۇشىمىزبەن جەڭدىك»، - دەدى مەملەكەت باسشىسى.

وسى ورايدا قاسىم-جومارت توقايەۆ ەلىمىزدىڭ قۇقىق قورعاۋ ورگاندارىنا قاتىستى پىكىر ءبىلدىردى. «ساتقىنداردىڭ وپاسىزدىعى قۇقىق قورعاۋ ورگاندارىنىڭ بەدەلىنە نۇقسان كەلتىرمەۋگە ءتيىس. وندا قىزمەت ەتەتىن ازاماتتار دا - ءوز باۋىرلارىمىز. ولار ەلمەن بىرگە ەكەنىن، تۋعان حالقى ءۇشىن قاسىق قانى قالعانشا كۇرەسەتىنىن دالەلدەدى. وتان الدىنداعى انتىنا ادال بولىپ، مەملەكەتىمىزدى جانقيارلىقپەن قورعادى. مەن سىن ساعاتتا قاتەرگە قايمىقپاي قارسى تۇرعان ءتارتىپ ساقشىلارىنا ريزاشىلىق بىلدىرەمىن. سونداي-اق ازاماتتارىمىز ەرىكتى تۇردە ءوز ىشىننەن جاساق قۇرىپ، قوعامدىق ءتارتىپتى ساقتاۋعا اتسالىستى. جاۋاپتى ساتتە بىرلىك پەن جاناشىرلىقتىڭ بىرەگەي ۇلگىسىن كورسەتكەن بارشا ازاماتقا العىس ايتامىن. وسى كۇندەردە حالقىمىز كەز كەلگەن ءقاۋىپ- قاتەردى جەڭە الاتىن ءبىرتۇتاس ەل ەكەنىن تانىتتى، وتانشىلدىق رۋحىنىڭ ارقاسىندا قاسيەتتى تاۋەلسىزدىگىمىزدى ساقتاپ قالدى. شىن مانىندە، قاڭتار وقيعالارى مەملەكەتتىلىگىمىز ءۇشىن زور سىناق بولدى. ءبىز جاردىڭ شەتىندە تۇردىق. ءبىر قادامدى قاتە جاساساق نەمەسە باتىل ارەكەت ەتپەسەك، مەملەكەتىمىز قۇردىمعا كەتەتىن ەدى»، - دەدى مەملەكەت باسشىسى.

بۇدان بۇرىن حابارلانعانداي، پرەزيدەنت بيىل قاڭتاردا توڭكەرىس جاساۋعا ۇمتىلعانداردىڭ اراسىندا بەلگىلى ادامدار بولعانىن، جوعارى لاۋازىم يەلەرى مەملەكەتكە ساتقىندىق جاساعانىن ايتتى.

اۆتور: رۋسلان عابباسوۆ

سوڭعى جاڭالىقتار