پرەزيدەنت ازاپتاۋمەن بايلانىستى قىلمىستاردى باس پروكۋراتۋراعا جۇكتەۋدى ۇسىندى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا ازاپتاۋلارمەن بايلانىستى قىلمىستاردى تەرگەپ- تەكسەرۋ تۋرالى پىكىر ءبىلدىردى، دەپ حابارلايدى قازاقپارات.

«ازاپتاۋلارمەن بايلانىستى قىلمىستاردى تەرگەپ-تەكسەرۋگە جۇيەلى تاسىلدەمە كەرەك. قازىرگى ۋاقىتتا بۇل باعىتقا جاۋاپ بەرەتىن ناقتى ءبىر ورگان جوق. بۇل تاجىريبە بەلگىلى ءبىر سىن- قاتەر تۋدىرۋى مۇمكىن. سوندىقتان بۇل فۋنكسيالاردى باس پروكۋراتۋراعا مىندەتتەۋدى ۇسىنامىن. بۇل ءتاسىل تەرگەۋدەگى اشىقتىق پەن بەيتاراپتىقتى قامتاماسىز ەتەدى، قۇقىق قورعاۋ سالاسىنداعى باسسىزدىق ءۇشىن جازانىڭ بار ەكەنىن كورسەتەدى»، - دەدى ق. توقايەۆ.

بۇعان دەيىن قاسىم-جومارت توقايەۆ قازاقستان حالقىنا جولداۋىندا كونستيتۋتسيالىق سوت قۇرۋدى ۇسىنعان ەدى. وندا باس پروكۋرور مەن ادام قۇقىعى جونىندەگى ۋاكىلگە دە كونستيتۋتسيالىق سوتقا جۇگىنۋ مۇمكىندىگىن بەرۋدى ۇسىندى.

اۆتور: ايجان سەرىكجان قىزى