سارحات بەيسەنوۆا: ەلوردادا بەتپەردەنى مىندەتتى تۇردە كيۋ رەجيمى تەك دالادا عانا توقتاتىلدى

نۇر- سۇلتان. قازاقپارات - ەلوردادا بەتپەردەنى مىندەتتى تۇردە كيۋ رەجيمى تەك دالادا عانا توقتاتىلدى. بۇل تۋرالى نۇر- سۇلتان قالاسىنىڭ باس سانيتارلىق دارىگەرى سارحات بەيسەنوۆا ءمالىم ەتتى، دەپ حابارلايدى قازاقپارات ءتىلشىسى.

«نۇر- سۇلتان قالاسى COVID-19 بويىنشا جاعدايدى تىركەۋ سانىنىڭ تومەندەۋىن ەسكەرە وتىرىپ، 16-اقپاننان باستاپ «سارى»، ال 21-اقپاننان باستاپ ەپيدەميولوگيالىق ماتريتسانىڭ «جاسىل» ايماعىندا ورنالاسقان. قالادا تاۋلىگىنە العاشقى زەرتحانالىق راستالعان 3 جاعداي تىركەلدى جانە ءوسىم 0.01 پاىزدى قۇرادى. سوڭعى اپتادا COVID-19 بويىنشا 55 جاعداي تىركەلدى. الدىڭعى اپتامەن سالىستىرعاندا سىرقاتتانۋشىلىقتىڭ 2,04 ەسە، ياعني 100 مىڭ تۇرعىنعا شاققاندا 9,2 دەن 4,5 كە دەيىن تومەندەگەنى بايقالادى»، - دەدى ول.

ونىڭ اتاپ وتۋىنشە، كوروناۆيرۋس بويىنشا ەپيدەميولوگيالىق جاعدايدىڭ تۇراقتانۋىنا بايلانىستى رەسپۋبليكانىڭ باس سانيتارلىق دارىگەرى كەيبىر كارانتيندىك شەكتەۋلەردى الىپ تاستاۋ تۋرالى شەشىم قابىلدادى. ءسوز ەپيدەميولوگيالىق قاۋىپ- قاتەردىڭ بارلىق ايماقتارىندا، سونىڭ ىشىندە نۇر- سۇلتاندا دا كوشەدە مىندەتتى ماسكا رەجيمىنىڭ الىنىپ تاستالۋى بولىپ وتىر.

«الايدا، 5 جاسقا دەيىنگى بالالاردى، ادامداردىڭ تاماقتانۋ كەزىندە، سونداي- اق سپورت ساباقتارىن وتكىزۋ كەزەڭدەرىن قوسپاعاندا، جابىق ءۇي- جايلاردىڭ اۋماعىندا، ياعني س و و- دا، كينوتەاترلاردا، فيتنەس كلۋبتاردا، قوعامدىق تاماقتانۋ نىساندارىندا جانە تاعى باسقالارىندا ماسكاسىز كىرۋگە جانە ماسكاسىز جۇرۋگە جول بەرىلمەيدى. سونىمەن قاتار، نىسان اكىمشىلىگى مەن جاۋاپتى ادامدار كەلۋشىلەر مەن جۇمىسشىلاردىڭ مىندەتتى تۇردە بەتپەردە كيۋىن باقىلاۋى كەرەك. بۇدان باسقا، ءبىزدىڭ استانامىز كىرەتىن «جاسىل» جانە «سارى» ايماقتارداعى بارلىق نىسانداردا «Ashyq« موبيلدىك قوسىمشاسىن قولدانۋ سۋبەكتىنىڭ شەشىمى بويىنشا ەرىكتى تۇردە، قىزمەتىنە شەكتەۋ قويماي جۇزەگە اسىرىلادى»، - دەدى باس سانيتارلىق دارىگەر.

وسى رەتتە ول ەلوردا تۇرعىندارى مەن قوناقتارىن قاراپايىم قاۋىپسىزدىك ءىس- شارالارىن ۇمىتپاۋعا شاقىرامىن.

«پاندەميا جاعدايىندا ءومىر ءسۇرىپ جاتقانىمىزعا، مىنەكي، ەكى جىل بولدى. وسى ۋاقىت ىشىندە ازاماتتار ءوز ارەكەتتەرى ءۇشىن جاۋاپكەرشىلىكتى سەزىنىپ، بارلىق قاۋىپسىزدىك شارالارىن ساقتاۋدى ۇيرەندى دەپ ويلايمىن. COVID-19-دان جالعىز قورعانىس- ۆاكسيناتسيا بولىپ قالا بەرمەك. سوندىقتان يممۋنيتەتتى نىعايتۋ ءۇشىن قايتا ۆاكسيناتسيادان وتۋگە شاقىرامىن»، - دەدى سارحات بەيسەنوۆا.