مارعۇلان سەيسەمبايەۆ اقشاسىن تەڭگەمەن ۇستايتىندارعا ونى ساقتاۋ مەن ءتيىمدى جاراتۋدىڭ جولىن ايتتى
مارعۇلان سەيسەمبايەۆ ءوزىنىڭ Youtube ارناسىندا وقىرمانداردان ءجيى كەلىپ تۇسكەن سۇراقتارعا جاۋاپ بەردى.
كاسىپكەر الدىمەن قازىرگى قارجى-ەكونوميكالىق جاعدايدىڭ كۇردەلەنە تۇسكەنىنە بايلانىستى ۇلتتىق ۆاليۋتانىڭ قالاي قۇنسىزداناتىنىن ءتۇسىندىردى.
«ەڭ الدىمەن ۇلتتىق ۆاليۋتا ۇلتتىق ەكونوميكانىڭ ايناسى ەكەنىن ەستە ۇستاۋ كەرەك. ادەتتە ەكونوميكاداعى اقشانىڭ مولشەرى ونداعى (سول ەكونوميكاداعى - رەد.) وندىرىلگەن تاۋاردىڭ سانىمەن تەڭ بولۋى كەرەك. اقشا - بۇل وندىرىلگەن بارلىق تاۋاردىڭ قۇنى. ەكونوميكادا ءوندىرىس توقتاعاندا نەمەسە قىسقارعان كەزدە اقشا سول قالپىندا قالسا، ۇلتتىق ۆاليۋتا قۇنسىزدانادى. ۇلتتىق ۆاليۋتا قۇنىن جوعالتقانىنا قاراماستان، ۇكىمەت الەۋمەتتىك مىندەتتەمەلەرمەن حالىقتى قامتاماسىز ەتۋى كەرەك. سول ءۇشىن ۇلتتىق بانك اقشا باسىپ شىعارۋى مۇمكىن، وسىلايشا زەينەتاقى، شاكىرتاقى جانە بيۋجەتتىك قىزمەتكەرلەردىڭ جالاقىسى سياقتى تولەمدەردى جۇزەگە اسىرادى. الايدا قۇنسىزدانۋدىڭ كەسىرىنەن حالىقتىڭ تابىسى ازايادى»، - دەيدى مارعۇلان سەيسەمبايەۆ.
كاسىپكەر اقشاسىن تەڭگەدەي ۇستايتىن ازاماتتارعا ونى ناقتى قانداي قاجەتتىلىكتەرگە جۇمساۋ كەرەگىن اتاپ ءوتتى.
«بىرىنشىدەن، وزىڭىزگە قاجەتتى تاۋار قورىن نەمەسە ازىق-تۇلىك قورىن جاساقتاڭىز. ول الداعى 2-3 ايعا جەتكىلىكتى قور بولۋى ءتيىس. قاڭتارداعى جاعداي بارلىعىمىزدىڭ ەسىمىزدە، بەسىنشى كۇنى ۇيدە ءبارىمىز ازىق-تۇلىكسىز قالدىق. ەكىنشىدەن، باعا قىمباتتاماي تۇرعاندا بۇزىلمايتىن تاۋارلاردى ساتىپ الىپ قويىڭىز. ونداي تاۋارلار قاتارىنا قاراقۇمىق، ماكارون، كونسەرۆىلەر سياقتى تاۋارلار جاتادى. ۇشىنشىدەن، وزىڭىزگە قاتتى قاجەت شەتەلدىڭ يمپورت تاۋارلارىن الىپ قويىڭىز. ويتكەنى دوللار قۇنى قارقىندى تۇردە وسە بەرەدى. گيگيەنا زاتتارى، بالالارعا ارنالعان جورگەكتەر، تۇرمىستىق حيميا. وسى ءۇش باعىتتا تەڭگەڭىزدى جاراتۋعا بولادى»، - دەيدى سەيسەمبايەۆ.
كاسىپكەر تەڭگەدەي اقشا ارتىلىپ جاتسا، ونى شەتەل ۆاليۋتاسىنا ايىرباستاپ الۋعا كەڭەس بەرەدى.
«ونىڭ بەلگىلى ءبىر بولىگىن، الداعى ەكى - ءۇش ايدىڭ شىعىنىن جابا الاتىنداي سومانى بانكتەن الىپ، ۇيىڭىزدە ساقتاڭىز»، - دەيدى ول.
سەيسەمبايەۆ ەلدە قانداي جاعداي بولماسىن، ازاماتتاردىڭ تەك وزىنە ارقا سۇيەۋى كەرەك ەكەنىن ايتادى.
