الماتىدا كليەنتتەر تاكسي جۇرگىزۋشىسىن پىشاقتاپ، كولىگىن ايداپ كەتكەن
وقيعا بيىل 12- ناۋرىزعا قاراعان ءتۇنى تۇركسىب اۋدانىندا بولعان. جۇرگىزۋشىنىڭ تانىستارى بۇل جايلى الەۋمەتتىك جەلىلەردە باياندادى.
«تاپسىرىس تۇسكەن. كليەنتتەردى اۋەجايعا اپارۋ كەرەك بولعان. جۇرگىزۋشى شاقىرعان ورىنعا كەلگەن، شاباداندار مەن سومكەلەرى بار ادامداردى كولىككە وتىرعىزعان. ءبارى تىنىش وتىرعان، كولىك شىعىس اينالما جولىمەن جۇرگەن. سودان كەيىن جۇرگىزۋشى بۇقتىرما كوشەسىنە بۇرىلعان. ەكوبەكەت ماڭىندا كليەنتتەر «نۇرشاشقان» شاعىناۋدانى ارقىلى ءجۇرۋىن سۇراعان. ولار جولدا كولىكتى توقتاتۋىن ءوتىنىپ، سول كەزدە كليەنتتەردىڭ ءبىرى جۇرگىزۋشىگە 6-7 رەت پىشاق سۇعىپ العان. ارى قاراي جوسپار بويىنشا جۇرگىزۋشىنى سول جەردە قالدىرىپ، كولىكتى ايداپ اكەتكەن»، - دەپ جازدى اۆتور.
جۇرگىزۋشى اۋرۋحانادا جاتىر، ونىڭ جاعدايى ءبىرقالىپتى. كولىك پەن قىلمىسكەرلەر ءالى تابىلماعان. بۇل ءبىرىنشى جاعداي بولماۋى مۇمكىن دەگەن بولجام بار.
الماتى قالالىق پوليتسيا دەپارتامەنتىنىڭ مالىمەتىنشە، اتالعان دەرەك قىلمىستىق كودەكستىڭ 192-بابى 4-بولىگى بويىنشا تىركەلدى.
«تۇركسىب اۋداندىق پوليتسيا ءبولىمى وسى قىلمىستىق ءىستى تەرگەپ جاتىر. ارنايى جەدەل-تەرگەۋ توبى قۇرىلدى، ونىڭ قۇرامىنا قالانىڭ كريمينالدىق پوليتسيا قىزمەتكەرلەرى كىردى. ولار كۇدىكتىلەردى ۇستاپ، قىلمىستىق جاۋاپكەرشىلىككە تارتۋعا بايلانىستى تەكسەرىس جۇرگىزەدى. الماتى پ د باسشىلىعى تەرگەۋ بارىسىن باقىلاۋعا الدى»، - دەدى ۆەدومستۆونىڭ باسپا ءسوز قىزمەتى وكىلى.
