پوليتسيا وبرازىن جاقسارتۋ ەمەس، قۇقىق قورعاۋ جۇيەسىن ترانسفورماتسيالاۋ قاجەت - سەرىك بەيسەمبايەۆ

نۇر-سۇلتان. قازاقپارات - ىشكى ىستەر ورگاندارىنىڭ قىزمەتىن جەتىلدىرۋدە زاماناۋي پوليتسيانىڭ كەيپىن ەمەس، جۇيەنى تولىقتاي جاڭارتۋ كەرەك.

بۇل پىكىردى PaperLab زەرتتەۋ ورتالىعىنىڭ جەتەكشىسى، الەۋمەتتانۋشى سەرىك بەيسەمبايەۆ العا تارتىپ وتىر، دەپ حابارلايدى قازاقپارات ءتىلشىسى.

بۇگىن ەلوردادا قۇقىقتىق ساياساتتى زەرتتەۋ ورتالىعى (LRPC) قوعامدىق قورىنىڭ ۇيىمداستىرۋىمەن «قازاقستاننىڭ جاڭا پوليتسياسى. زاماناۋي قيىندىقتار مەن قوعامنىڭ سۇرانىستارى» تاقىرىبىندا ونلاين پىكىرتالاس ءوتتى. اتالعان ونلاين شاراعا قۇزىرلى ورگان وكىلدەرىمەن قاتار، ساراپشىلار قاتىستى.

«قولجەتىمدى، اشىق زەرتتەۋلەر قوعامنىڭ قازاقستان پوليتسياسىنا دەگەن سەنىمىنىڭ ءارتۇرلى ەكەنىن كورسەتىپ وتىر. ق ر ستاتيستيكا بيۋروسىنىڭ رەسمي دەرەگىنە سۇيەنسەك، حالىقتىڭ پوليتسياعا سەنىمى - %77. ال حالىقارالىق جانە تاۋەلسىز زەرتتەۋلەر ءتارتىپ ساقشىلارىنا دەگەن سەنىم دەڭگەيىن 53 تەن %65 عا دەيىنگى كورسەتكىشتى العا تارتادى. قازاقستان پوليتسياسىنىڭ بەينەسى ىسىنە قاراما-قايشى. ونىڭ سەبەبى پوليتسيانىڭ ءارتۇرلى فۋنكتسيونالى بار ءتۇرلى ۆەدومستۆولاردى بىرىكتىرۋىنە بايلانىستى»، - دەدى الەۋمەتتانۋشى سەرىك بەيسەمبايەۆ.

سونداي-اق، ساراپشى جالپى ىشكى ىستەر ورگاندارىنىڭ قىزمەتىنە قاتىستى ساۋالنامالارعا وتە مۇقيات قاراۋ كەرەك ەكەنىن اتاپ ءوتتى.

«پوليتسيا رەفورماسى يميدجدى جاقسارتۋعا ەمەس، بەلسەندى ازاماتتىق قوعامنىڭ قاتىسۋىمەن جانە وزگەرىستەرگە جاپپاي سۇرانىستى ەسكەرە وتىرىپ، قۇقىق قورعاۋ جۇيەسىن وزگەرتۋگە باعىتتالۋى كەرەك. پوليتسيانىڭ كەيپىن جاقسارتۋ ەمەس، قۇقىق قورعاۋ جۇيەسىن ترانسفورماتسيالاۋ قاجەت»، - دەيدى ول.

ودان بولەك، الەۋمەتتانۋشى ىشكى ىستەر ورگاندارىنىڭ قىزمەتىنە قاتىستى ناقتى جانە ساپالى ادىستەردى قولدانا وتىرىپ، كوبىرەك زەرتتەۋ جۇرگىزۋ قاجەتتىگىن العا تارتتى.