امانگەلدى ايتالى: كورىسۋ - مۇسىلماندىقتى قابىلداماستان بۇرىن پايدا بولعان تۇركى مادەنيەتى
كورىسۋ كۇنى مەرەكەسىنە وراي اعا بۋىن وكىلدەرى، ەڭبەك ارداگەرلەرى مەن اياۋلى اجەلەرگە ارنايى سىيلىقتار تاپسىرىلىپ، قۇرمەت جاسالدى. ايماق باسشىسى وڭداسىن ءورازاليننىڭ ارنايى تاپسىرماسىمەن وبلىستىق ءماسليحات حاتشىسى امانگەلدى نۇعمانوۆ، وبلىس اكىمىنىڭ ورىنباسارى بۇلبۇل ەلەۋسىنوۆا، قالا اكىمى اسحات شاحاروۆ مەملەكەت جانە قوعام قايراتكەرى، عالىم- ۇستاز امانگەلدى ايتالى، تاريحشى عالىم، پروفەسسور زاكىراتدين بايدوسوۆ، وقۋ- اعارتۋ ءىسىنىڭ ۇزدىگى قاراكوز قوسايەۆا، ەڭبەك ارداگەرى بەرىكوۆ نيەتجان سىندى زيالى قاۋىم وكىلدەرىنىڭ ۇيىنە بارىپ قۇتتىقتاپ شىقتى.
«كورىسۋ - عالىمداردىڭ ايتۋى بويىنشا مۇسىلماندىقتى قابىلداماستان بۇرىن پايدا بولعان تۇركى مادەنيەتى. ەلىمىزدىڭ ىرىس- ىنتىماعىن ارتتىراتىن ايرىقشا مەيرام. ادامدار بۇل كۇنى اراسىنداعى بۇرىنعى وكپە- رەنىشىن كەشىرىپ، ارازدىقتى ۇمىتىپ، ءبىر- بىرىنە اماندىق- ساۋلىق تىلەيدى. «كوكتەمگە امان- ەسەن جەتتىك» دەپ داستارحان جايىپ، ۇلكەندەرگە سالەم بەرىپ، قۇتتىقتاپ جاتادى. مەملەكەت باسشىسى ق. توقايەۆ «تاۋەلسىزدىك بارىنەن قىمبات» اتتى ماقالاسىندا ناۋرىز مەيرامىنىڭ مازمۇنىن ودان ءارى بايىتۋ كەرەگىن ايتقان ەدى. وسى رەتتە، ۇلتتىق قۇندىلىقتارىمىز بەن سالت- داستۇرلەرىمىزدى جاڭعىرتۋدىڭ ماڭىزى وتە زور. بارشا اعايىندى كورىسۋ كۇنىمەن شىن جۇرەكتەن قۇتتىقتايمىن»- دەپ اتاپ ءوتتى بەلگىلى عالىم امانگەلدى ايتالى.
ارداگەرلەر وبلىس اكىمىنىڭ مەرەيلى مەرەكە قارساڭىندا اعا بۋىن وكىلدەرىن ۇمىتپاي، ارنايى قۇتتىقتاپ، جىلى لەبىزىن ارناعانىنا جانە سىيلىقتار تابىس ەتكەنىنە ءوز العىسىن ءبىلدىردى.
