رەسەي - ۋكراينا كەلىسسوزى ءوتتى

نۇر-سۇلتان.قازاقپارات - بۇگىن رەسەي مەن ۋكراينا اراسىنداعى كەزەكتى كەلىسسوزى ونلاين فورماتتا ۆيدەوبايلانىس ارقىلى ۇيىمداستىرىلدى.

ۋكراينا پرەزيدەنتى كەڭسەسى باسشىسىنىڭ كەڭەسشىسى ميحايل پودولياك ءوزىنىڭ Twitter- دەگى پاراقشاسىندا كەلىسسوزدىڭ وتە قيىن ءوتىپ جاتقانىن حابارلادى. ونىڭ ايتۋىنشا، ەكى جاق تا ءوز ۇستانىمدارىن ايقىن ءبىلدىرىپ جاتىر. تاراپتار كوزقاراسىنىڭ قايشىلىعىنا ساياسي جۇيەدەگى ايىرماشىلىق سەبەپ دەپ جازعان. ايتا كەتەيىك، ۋكراينا مەن رەسەي دەلەگاتسيالارىنىڭ بۇعان دەيىنگى كەلىسسوزدەرى بەلارۋس شەكاراسىندا ءوتتى. جولعا ۇزاق ۋاقىت كەتەتىندىكتەن، وسى جولعى شارانى ونلاين فورماتتا وتكىزۋدى ءجون كورگەن.

ميحايل پودولياك، ۋكراينا پرەزيدەنتى كەڭسەسى باسشىسىنىڭ كەڭەسشىسى:

- ءبىزدىڭ ۇستانامىمىز وزگەرگەن جوق. بەيبىتشىلىكتى تالاپ ەتەمىز، اتىس- شابىستىڭ توقتاۋىن، رەسەي اسكەرىنىڭ ەلدەن كەتۋىن تالاپ ەتەمىز. سوندا عانا ساياسي رەتتەۋ مەن تاتۋ كورشىلىك قاتىناستار جايىندا ءسوز قوزعاۋعا بولادى.

www.24.kz