الاكول ماڭىنداعى اۋەجاي جوندەۋدەن وتۋدە

وسكەمەن. قازاقپارات - شىعىس قازاقستان وبلىسى ءۇرجار اۋدانىنداعى اۋەجايدا رەكونسترۋكتسيالاۋ جۇمىستارى جازعا دەيىن اياقتالادى دەپ كۇتىلۋدە، دەپ حابارلايدى قازاقپارات ءتىلشىسى.

ايماق باسشىسى دانيال احمەتوۆ الاكولگە جاقىن ورنالاسقان ءۇرجار اۋىلىنداعى اۋەجايدا جۇرگىزىلىپ جاتقان رەكونسترۋكتسيالاۋ جۇمىستارى بويىنشا جينالىس وتكىزدى.

«بۇل جوبا «جۇمىسپەن قامتۋدىڭ جول كارتاسى» باعدارلاماسى اياسىندا جۇزەگە اسىرىلۋدا. ءۇرجار اۋدانىندا شىعىس قازاقستاننىڭ ءىنجۋ-مارجانى سانالاتىن - الاكول بار. سوندىقتان تۋريستىك ماۋسىمنىڭ باسىندا اۋەجايدىڭ تۋريستەردى قابىلداي الۋى وتە ماڭىزدى. بۇل وسى سالانى دامىتۋداعى ۇلكەن قادام. قازىر باستى كەزەڭدەردىڭ ءبىرى - ۇشاقتاردى تۇنگى ۋاقىتتا قابىلداۋعا مۇمكىندىك بەرەتىن زاماناۋي جارىق-دابىل جابدىعىن ورناتۋ جۇمىستارى جۇرگىزىلۋدە»، - دەدى وبلىس اكىمى.

ءوز سوزىندە ول ساراپتامالىق كومپانيالاردى شاقىرۋدى تاپسىردى. ولار قوندىرعىنىڭ دۇرىس جانە اۋىتقۋسىز جاسالعانىنا كوز جەتكىزۋى شارت.

«ۇشۋ-قونۋ جولاعىنداعى جۇمىستار اياقتالۋعا جاقىن. ناتيجەسىندە، ونىڭ ەنى 35 مەترگە، ال ۇزىندىعى 2,7 شاقىرىمعا دەيىن ۇلعايدى. قايتا جاڭعىرتۋدان كەيىن ءۇرجار اۋىلىنىڭ اۋەجايى شاعىن اۆياتسيانىڭ عانا ەمەس، Embraer، Bombardier كلاستى جانە باسقا دا ۇشاقتاردى قابىلداي الادى. بۇل الاكول جاعالاۋىنداعى تۋريستەر اعىنىن ارتتىرۋعا مۇمكىندىك بەرەدى»، - دەدى دانيال احمەتوۆ.