قاڭتاردا تارتىپسىزدىكتىڭ ورىن الۋىنا مۇددەلى توپتاردىڭ بولعانىنا كوزىمىز جەتتى - ابزال قۇسپان
بۇل تۋرالى بەلگىلى ادۆوكات ابزال قۇسپان ايتتى، دەپ حابارلايدى قازاقپارات ءتىلشىسى.
«سوڭعى بىرنەشە اپتا كولەمىندە، كوميسسيا («امانات» كوميسسياسى) وڭىرلەرگە شىقپاي- اق، ءوز جۇمىسىن ورتالىق مەملەكەتتىك جانە قۇقىق قورعاۋ ورگاندارى ارقىلى، جۇيەلى تۇردە اتقارۋعا كوشكەنىنە نازارلارىڭىزدى اۋدارامىن. وسى اتقارىلعان جۇمىستار، رەسپۋبليكا كولەمىندە سول «قاڭتار وقيعالارى» بويىنشا جالپى كارتينانى بىلۋگە جانە وعان قاتىستى قۇقىق قورعاۋ ورگاندارى تاراپىنان اتقارىلعان جۇمىستار مەن ولاردىڭ قىزمەتىندەگى ءبىرقاتار كەمشىلىكتەر مەن جەتىستىكتەرى تۋرالى الدىن الا قورىتىندى جاساۋعا مۇمكىندىك بەرەدى.
بىرىنشىدەن، قوعامدى مازالايتىن ەڭ ماڭىزدى سۇراقتاردىڭ ءبىرى - «قاڭتار وقيعاسى» سياقتى قاندى قىرعىن قالاي بولدى؟ تەرروريزم بولدى ما؟ ونى ۇيىمداستىرۋشىلار بولدى ما؟» دەگەن ماعىنادا، سول سەبەپتى وسى ماسەلەلەر بويىنشا قىسقاشا توقتالىپ كەتەيىن»، - دەدى ا. قۇسپان ءماجىلىستىڭ جالپى وتىرىسىندا.
ونىڭ ايتۋىنشا، بارلىق وڭىردە سول جاپپاي تارتىپسىزدككە قاتىسۋشىلارمەن بولعان كەزدەسۋ ناتيجەسىندە بارىنە بىردەي ورتاق، مىناداي بەلگىلەرى بارى انىقتالدى:
- جاپپاي تارتىپسىزدىكتىڭ ءبىر كەزەڭ، ءبىر ۋاقىت ارالىعىندا باستالۋى؛
- ارانداتۋشى توپتىڭ بولۋى، ولاردىڭ ورتاق، ءبىر تالاپتارىنىڭ بولۋى، مىسالى، بارلىق جەردە دە بەيبىت ميتينگىگە شىققان كوپشىلىكتى وبلىس، قالا اكىمشىلىگىن باسىپ الۋعا ۇگىتتەۋشىلەردىڭ بولعانى؛
- جەكەلەگەن جاعدايدا، قۇقىق قورعاۋ ورگاندارىنىڭ ۋاقىتىلى قيمىلداماۋى، كەيدە مۇلدەم ارەكەتسىزدىك تانىتۋى؛
- وڭتۇستىك وڭىرلەردە، بەيبىت ميتينگىگە قاتىسۋشىلار بۇرىن وزدەرى كورمەگەن، تانىمايتىن اسكەري ءتارتىپتى، بەلگىسىز ادامداردىڭ بولعانى ت. ب.
«بۇل جاعدايلار، ءاۋ باستا بەيبىت باستالعان ميتينگىلەردى جاپپاي تارتىپسىزدىككە ۇلاستىرۋعا مۇددەلى توپتاردىڭ بولعانى جانە ولاردىڭ ورتالىقتاندىرىلعان تۇردە، ماقساتتى جۇمىس ىستەگەنىنە ءبىزدىڭ كوزىمىزدى جەتكىزە ءتۇستى»، - دەدى ا. قۇسپان.
اۆتور: رۋسلان عابباسوۆ
