باس پروكۋرور كۇش قۇرىلىمدارىنىڭ ءوز عيماراتتارىن، قارۋمەن قوسا تاستاپ كەتكەنى تۋرالى ايتتى

نۇر-سۇلتان. قازاقپارات - ءماجىلىستىڭ جالپى وتىرىسىندا «جاڭا قازاقستان» دەپۋتاتتىق توبىنىڭ ساۋالىنا اۋىزشا جاۋاپ بەرگەن ق ر باس پروكۋرورى بەرىك اسىلوۆ قاڭتار وقيعاسى كەزىندە كۇش قۇرىلىمدارىنىڭ جەكەلەگەن باسشىلارىنىڭ ءىس- ارەكەتتەرىن قۇقىقتىق باعالاۋ بويىنشا مالىمەت بەردى، دەپ حابارلايدى قازاقپارات ءتىلشىسى.

ءماجىلىستىڭ جالپى وتىرىسىندا «جاڭا قازاقستان» دەپۋتاتتىق توبىنىڭ ساۋالىنا اۋىزشا جاۋاپ بەرگەن ق ر باس پروكۋرورى بەرىك اسىلوۆ قاڭتار وقيعاسى كەزىندە كۇش قۇرىلىمدارىنىڭ جەكەلەگەن باسشىلارىنىڭ ءىس-ارەكەتتەرىن قۇقىقتىق باعالاۋ بويىنشا مالىمەت بەردى.

«5-قاڭتاردا الماتى قالاسىنداعى، الماتى، جامبىل جانە قىزىلوردا وبلىستارىنداعى 2 پوليتسيا دەپارتامەنتى مەن ۇ ق ك-نىڭ 3 دەپارتامەنتى ءوز عيماراتتارىن، قارۋمەن قوسا تاستاپ كەتكەن. وسى فاكتىلەر بويىنشا 7 قىلمىستىق ءىس قوزعالدى. ولار بويىنشا تەرگەۋ ارەكەتتەرىنىڭ نەگىزگى بولىگى اياقتالدى. الماتى قالاسى ۇلتتىق قاۋىپسىزدىك كوميتەتى دەپارتامەنتىنىڭ باستىعى ماجيلوۆ قاماۋعا الىندى. باسقا تۇلعالارعا قاتىستى قازىر دالەلدەردى جيناۋ جانە تالداۋ جۇرگىزىلۋدە»، - دەدى بەرىك اسىلوۆ.

سونداي-اق، باس پروكۋرور قورعانىس مينيسترلىگىنىڭ بۇرىنعى باسشىلىعىنىڭ وكىلەتتىكتەرىن اسىرا پايدالانۋ فاكتىسى بويىنشا تاعى ءبىر قىلمىستىق ءىس تەرگەلىپ جاتقانىن اتاپ ءوتتى.

«بۇرىنعى قورعانىس ءمينيسترى قاماۋعا الىندى. تەرگەۋ جالعاسۋدا» ، - دەدى ول.