مينيستر پوليتسيا قاڭتار وقيعالارى كەزىندە نە ءۇشىن قارۋ قولدانعانىن ايتتى

نۇر-سۇلتان. قازاقپارات - قاڭتار وقيعالارى كەزىندە پوليتسيا توتەنشە جاعداي جانە تەرروريزمگە قارسى وپەراتسيا اياسىندا قارۋ قولدانۋعا ءماجبۇر بولدى.

بۇل تۋرالى ماجىلىستە ق ر ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، قاڭتار وقيعالارى كەزىندە قارجى ۇيىمدارى، بانكتەر، ساۋدا ورتالىقتارى، دۇكەندەر تونالدى. ناتيجەسىندە، 1 700 ازامات پەن بيزنەس سۋبەكتىلەرى زارداپ شەكتى. جالپى شىعىن سوماسى 100 ميلليارد تەڭگەدەن استى.

«وكىنىشكە وراي، 19 قىزمەتكەرىمىز قازا تاپتى. 3 مىڭنان استام پوليتسيا مەن اسكەري قىزمەتشىلەر جاراقات الدى. كوپتەگەن قىزمەتكەر ءالى دە ەم الۋدا. ءبىرازى وكىنىشكە وراي دەنساۋلىقتارىنا بايلانىستى بولاشاقتا ءبىزدىڭ قاتارىمىزدا قىزمەتتەرىن جالعاستىرا المايدى. سوندىقتان، قىزمەتكەرلەر توتەنشە جاعداي جانە تەرروريزمگە قارسى وپەراتسيا اياسىندا قارۋ قولدانۋعا ءماجبۇر بولدى»، - دەدى ول.

وسى ورايدا مينيستر قارۋ قولدانۋ «قۇقىق قورعاۋ قىزمەتى تۋرالى» زاڭنىڭ 61-بابىنا سايكەس جۇزەگە اسقانىن ايتتى.

«اتاپ ايتقاندا ازاماتتاردى قورعاۋ؛ قىزمەتكەرلەرگە جانە كۇزەتۋ وبەكتىلەرىنە جاسالعان شابۋىلعا تويتارىس بەرۋ؛ قارۋ مەن ارنايى كولىكتەردى باسىپ الۋعا جول بەرمەۋ جانە قارۋلى ادامداردى ۇستاۋ ماقساتىندا قولدانىلدى»، - دەدى مارات احمەتجانوۆ.

اۆتور: مارلان جيەمباي