زاماناۋي ەرتەگىلەر جول تارتتى
وسىعان وراي، تاراز قالاسىنداعى ش. ءۋاليحانوۆ اتىنداعى امبەباپ- عىلىمي كىتاپحاناسىندا د. قونايەۆ اتىنداعى وبلىستىق بالالار مەن جاسوسپىرىمدەر كىتاپحاناسىنىڭ ۇيىمداستىرۋىمەن OrdaGen بالالارعا ارنالعان ەرتەگىلەر جوباسى بويىنشا جارىق كورگەن تانىمدىق وقۋ قۇرالدارىنىڭ تۇساۋكەسەرى ءوتتى.
جيىندا وبلىس اكىمىنىڭ ورىنباسارى داۋلەت كارىبەك ءسوز الىپ، OrdaGen جوباسى زاماناۋي ەرتەگىلەر ارقىلى بالالاردىڭ قيالىن دامىتىپ قانا قويماي، بالالارعا ارنالعان قازاق ءتىلدى كونتەنتتىڭ دە دامۋىنا ۇلەس قوسىپ وتىرعانىن اتاپ ءوتتى. سونىمەن قاتار OrdaGen جوباسىنىڭ اۆتورى ايبەك قۋاتباي مەن جەتەكشىسى پاراسات تانەن جوبانىڭ ماقساتى تۋرالى اڭگىمەلەدى. كۇنى بۇگىنگە دەيىن اتالعان جوبا اياسىندا 1000 عا جۋىق زاماناۋي ەرتەگىلەر جازىلىپ، ءار ەرتەگىنىڭ اۋديونۇسقاسى دايىندالىپتى. ءۇش ءتۇرلى تاقىرىپتا شاعىن مۋلتفيلمدەر ءتۇسىرىلىپ، بالالارعا OrdaGen ءموبيلدى قوسىمشاسى تەگىن پايدالانۋعا بەرىلگەن. سونداي- اق Ordagen باسپاسىنان شىققان «مىڭ بوياۋلى ORDA ،»ORDA ەرتەگىلەرىنىڭ تولىق جيناعى» جانە «بەركە ايۋ جانە كاسىپ» كىتاپتارى كوپشىلىككە تانىستىرىلدى. ماسەلەن، «ORDA ەرتەگىلەرىنىڭ تولىق جيناعى» كىتابىنا قازاق تىلىندەگى زاماناۋي 33 ەرتەگى توپتاستارىلعان. وقۋشى بالالارعا ىڭعايلى بولۋى ءۇشىن ءاربىر ەرتەگىنىڭ سوڭىندا QR- كود بەرىلگەن. سول ارقىلى بارلىق ەرتەگىنىڭ اۋديونۇسقاسىن تىڭداۋعا جانە مازمۇنىن اشاتىن ارنايى سۋرەتتەردى كورۋگە بولادى.
كەزدەسۋ بارىسىندا اقىن، قازاقستان جازۋشىلار وداعىنىڭ مۇشەسى ايشا كوپجاساروۆا، بەلگىلى ساتيريك باقىتجان سوۆەت ۇلى سىندى قالامگەرلەر ءسوز الىپ، بالالار ادەبيەتىنىڭ بۇگىنى مەن ەرتەڭى تۋرالى اڭگىمە قوزعادى. سونىمەن قاتار OrdaGen جوباسىنىڭ دا ەلىمىزدەگى بالالار ادەبيەتىن دامىتۋعا لايىقتى ۇلەس قوساتىنىن، بۇل ارقىلى بالالاردىڭ كىتاپ وقۋعا دەگەن قىزىعۋشىلىعىن وياتاتىنىن اتاپ ءوتتى. شارا بارىسىندا وبلىس اكىمىنىڭ ورىنباسارى داۋلەت كارىبەك پەن اقىن ايشا كوپجاساروۆا جارىق كورگەن كىتاپتاردىڭ تۇساۋىن كەستى.
جامبىل وبلىسى
حاميت ەسامان
كوللاجدى جاساعان قونىسباي شەجىمباي
egemen.kz
