شىمكەنتتە ناۋرىزدى تويلاۋ باستالىپ كەتتى
شىمكەنتتە ۇلىستىڭ ۇلى كۇنى - ناۋرىز مەرەكەسىنە ارنالعان ءىس- شارالار باستالدى. بۇگىن قالادا وتكەن قوشقار اتا سەيىلىندە شىمكەنتتىك تۇرعىن 45 كەلىلىك قوشقاردى 47 رەت كوتەردى. ال، بايدىبەك اۋدانى تەرەكتى اۋىلىنان كەلگەن مەيىرحان رىسداۋلەتوۆ 105 كەلىلىك قوشقاردى 21 رەت كوتەردى. كوكتەم مەرەكەسىندە شىمكەنتتىك جىگىتتەر دوڭكە جارۋدان دا جارىستى. ال، اق جاۋلىقتى اجەلەر قول ديىرمەن تارتىپ، كەلى ءتۇيدى. تاباعا نان ءپىسىردى. كەلىندەر بولسا، ساماۋرىن قويىپ، پالاۋ باستى.
مەرەكەلىك ءىس شاراعا كەلۋشىلەر تەاتر ارتىستەرىنىڭ قويىلىمدارىن تاماشالادى. ساز بالشىقتان قۇمىرا جاساعان قولونەرشىلەردىڭ ونەرىن كوردى. ۇستالاردىڭ تەمىر مەن اعاشتان جاساعان بۇيىمدارىمەن تانىستى.
شىمكەنت قالا اكىمىنىڭ ءبىرىنشى ورىنباسارى شىڭعىس مۇقان كوپشىلىكتى ناۋرىز مەرەكەسىمەن قۇتتىقتاپ، سابيلەردىڭ تۇساۋىن كەستى. كوكتەم مەرەكەسىندە كوپشىلىككە ناۋرىز كوجە تاراتىلدى. ايتا كەتەيىك، بيىل شىمكەنتتە ناۋرىزناما ءداستۇرى زاماناۋي ۇلگىدە جاڭارتىلىپ، توعىز كۇن ءتۇرلى اتاۋمەن مەرەكەلەنەدى. ءار كۇن وزىندىك سيپاتى، وزىندىك ەرەكشەلىكتەرمەن ۇيىمداستىرىلماق.
ءىس- شارالار بارىسى «كورىسۋ كۇنى»، «جايلاۋ كۇنى»، «شەجىرە كۇنى»، «تاريحقا تاعزىم كۇنى»، «يگى ىستەر»، «شىمىرلىق پەن شەبەرلىك»، «زياتكەرلىك كۇنى» بولىپ جالعاسپاق. سونداي- اق، «ۇلتتىق تاعامدار»، «Nauryz Fashion Day» جانە «گاسترونوم Fest» فەستيۆالى ۇيىمداستىرىلادى. 22-ناۋرىزدا « ۇلىستىڭ ۇلى كۇنى ناۋرىز»، «ناۋرىز شىمقالادا» اتتى ءىس- شارالار وتەدى دەپ جوسپارلانىپ وتىر. اتاۋلى كۇندەر 23-ناۋرىزدا «جورالعى كۇنىمەن» اياقتالادى.
