قازاقستان اسكەرىنىڭ جاۋىنگەرلىك دايارلىق باعدارلاماسىنا وزگەرىستەر ەنگىزىلۋدە
ونىڭ سوڭعى كەزەڭى روتالىق تاكتيكالىق وقۋ-جاتتىعۋلاردىڭ جاۋىنگەرلىك اتىس جاتتىعۋلارىمەن اياقتالادى، دەپ حابارلايدى قازاقپارات.
ق ر قورعانىس مينيسترلىگىنەن ءمالىم ەتكەندەي، مەملەكەت باسشىسىنىڭ جاۋىنگەرلىك دايارلىق باعدارلاماسىن قايتا قاراۋ جونىندەگى تاپسىرماسىنا سايكەس، باس شتابتا قارۋلى كۇشتەردىڭ جاۋىنگەرلىك وقۋ پروتسەسىن رەتتەيتىن قۇجاتتى قايتا وڭدەۋدى جۇرگىزەتىن جۇمىس توبى قۇرىلدى.
«سونىمەن قاتار، اسكەرلەردى وقىتۋدا جەكە قۇرامنىڭ جاۋىنگەرلىك ماشىعىن جەتىلدىرۋگە باعىتتالعان وزگەرىستەر قازىردىڭ وزىندە ەنگىزىلۋدە. روتانى دايىنداۋ بارىسىندا اسكەري قىزمەتشىلەردىڭ ەلدى مەكەندەر مەن تاۋلى جەرلەردە زاڭسىز قارۋلى توپقا قارسى ەپتى جانە ۇيلەسىمدى ءىس-قيمىل جاساپ، شارتتى قارسىلاستى بارلاۋ جانە جويۋ ءۇشىن ۇشقىشسىز ۇشۋ اپپاراتتارىن قولدانۋعا باسا نازار اۋدارىلادى»، - دەدى مينيسترلىكتەن.
ارنايى وپەراتسيا جۇرگىزۋ ماسەلەلەرىن پىسىقتاۋ كەزىندە باسقا اسكەرلەر مەن اسكەري قۇرالىمداردىڭ بولىمشەلەرىمەن ءوزارا ءىس-قيمىل جانە ءىس جۇزىندە تاجىريبە الماسۋ ۇيىمداستىرىلدى.
«روتا دەگەنىمىز ەلدى مەكەندە زاڭسىز قارۋلى توپتارعا قارسى جاۋىنگەرلىك ءىس-قيمىل جۇرگىزەتىن نەگىزگى بۋىن. سوندىقتان اسكەري قىزمەتشىلەر دە، كومانديرلەر دە قۇبىلمالى جاعدايدا سەنىمدى باعدارلاپ، قولدا بار كۇشتەر مەن قۇرالداردى ءتيىمدى پايدالانا الۋى اسا ماڭىزدى»، - دەپ اتاپ ءوتتى «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ جاۋىنگەرلىك دايارلىق جونىندەگى ورىنباسارى باۋىرجان كۇرەڭكەيەۆ.
