قاراعاندى وبلىسىندا دارىندى ەگىز بالالار اراسىندا بايقاۋ ءوتتى

بۇكىل سەگىز جۇپ وزدەرىن جاقسى جاعىنان كورسەتە ءبىلدى، دەپ حابارلايدى قازاقپارات ءتىلشىسى.
جاڭاارقا مادەنيەت ءۇيىنىڭ بالالار مەن جاس وسپىرىمدەر ءبولىمىنىڭ مەڭگەرۋشىسى ايمان ايتجانوۆا وسىنداي بايقاۋدى ءۇشىنشى رەت وتكىزىپ وتىر.
«مەن بالالاردى جاقسى كورەمىن جانە ولاردى شىعارماشىلىق جانە پايدالى قىزمەتكە تارتۋعا تىرىسامىن. ءبىزدىڭ اۋداندا ەگىزدەر كوپ. بىردە ماعان وسىنداي بايقاۋ ۇيىمداستىرۋ يدەياسى كەلدى، سەبەبى ەگىزدەر، ادەتتە، وتە دارىندى بولىپ كەلەدى. بۇرىن بايقاۋ اۋقىمدىراق وتەتىن. بيىلعى جىلى پاندەمياعا بايلانىستى ءبىز ءبىرشاما شەكتەۋىمىز كەرەك بولدى، ءبىراق سوعان قاراماستان بارلىعى ويداعىداي ءوتتى. بالالار ءوزىن-ءوزى تانىستىرۋ، شىعارماشىلىق قويىلىم جانە دەفيلە كەزىندە وزىندىك ەرەكشەلىگى ءۇشىن باعالاندى»، - دەپ ەسەپتەيدى ايمان ايتجانوۆا.
جاڭاارقا اۋدانىنىڭ ءار اۋىلدارىنان كەلگەن سەگىز جۇپ بايقاۋعا تىڭعىلىقتى دايىندالدى. ءادىلقازىلار القاسىنىڭ كوڭىلىن ىنتىماق اۋىلىنان كەلگەن 6 جاسار ءىنجۋ مەن مارجان امانقان جاۋلاپ الدى.
ولار «قۋىرشاق» بيىمەن ونەر كورسەتىپ، بايقاۋدىڭ گران-ءپريىن جەڭىپ الدى.
«مەنىڭ قىزدارىم مەكتەپالدى دايارلىق سىنىبىندا وقيدى. ولار قويىلىم الدىندا قاتتى ۋايىمداپ، تىڭعىلىقتى دايىندالدى. مەن سايىس ۇيىمداستىرۋشىسىنا بالالار ءوز تالانتتارىن اشا الاتىن ءىس-شارالار ۇيىمداستىرعانى ءۇشىن ريزاشىلىعىمدى بىلدىرەمىن. قىزدارىم كەلبەتى جاعىنان دا، تابيعاتى بويىنشا دا ءارتۇرلى. بىرەۋى شيراق، ەكىنشىسى جۋاستاۋ. بىرەۋى اققۇبا، ەكىنشىسى قاراتورى. بۇل بايقاۋدا ولار ءبىر-بىرىمەن ۇيلەسىمدى بولدى»، - دەدى قىزداردىڭ اناسى اينۇر جاقىپبەكوۆا.
سونداي-اق، باس جۇلدەنى قاراعاش اۋىلدىق وكرۋگىنىڭ ىنتالى اۋىلىنان كەلگەن 9 جاسار نۇراحمەت پەن نۇرجامال جاقسىبايەۆتار، جاڭاارقالىق 11 جاسار ارۋجان مەن اياجان تولەۋ يەلەندى.
تالانتتار بايقاۋىندا ءبىرىنشى ورىندى م. جۇماجانوۆ اۋىلىنان كەلگەن 9 جاسار نۇراي مەن اراي ساپاروۆالار، 6 جاسار ءمادي مەن عاني نۇريدەن، سونداي-اق جاڭاارقادالىق 5 جاسار ايىم مەن ايشا نۇربول قىزى جانە تۇگىسكەن اۋىلىنان كەلگەن 11 جاسار بەكارىس پەن بەيبارىس ءبولىستى.
ەكىنشى ورىندى جاڭاارقا تۋماسى 12 جاسار پەريزات پەن پاكيزات جاقسىلىق جەڭىپ الدى.
«قازىلار القاسى قاتىسۋشىلاردى ءۇش جاس ساناتى بويىنشا باعالادى. ەشكىمدى رەنجىتكىمىز كەلمەدى. بالالاردىڭ ءبارى دارىندى. بولاشاقتا بۇل بايقاۋدى وڭىرلىك دەڭگەيدە وتكىزۋدى جوسپارلاپ وتىرمىز»، - دەدى ايمان ايتجانوۆا.