رەسەيلىك بوكسشى «كانەلونىڭ» الداعى ايقاسىنا بولجامىن ايتتى
- الەكسەي، مامىر ايىنىڭ العاشقى اپتاسىندا ا ق ش- تا ساۋل الۆارەس پەن دميتري بيۆول جۇدىرىقتاسادى. بۇل ايقاستان نە كۇتەسىز؟
- دميتري بيۆولدىڭ تەحنيكالىق الەۋەتى جاقسى. ول شارشى الاڭدا كوپ قيمىلدايدى. قارسىلاسىنىڭ ءاربىر قادامىن اڭدىپ باسادى. ال «كانەلو» بولسا كوپ شابۋىلدايتىن بوكسشىلاردىڭ قاتارىنان. بۇل جەكپە-جەكتىڭ ناتيجەسى بيۆولدىڭ دايىندىعىنا بايلانىستى بولادى. ەگەر دميتري مەكسيكالىقتىڭ العاشقى راۋندتارداعى قارقىنىنا توتەپ بەرىپ، قارىمتا سوققىلارىن جاساسا جەڭىسكە جەتۋى كەرەك. مەنىڭ ويىمشا، قازىرگى تاڭدا رەسەيلىك بوكسشىنىڭ كومانداسى وسى نارسەلەرگە كوپ ءمان بەرىپ جاتقان سەكىلدى.
- بوكس الەمىندە گولوۆكين مەن الۆارەس جەكپە-جەگىنىڭ تريلوگياسى بولۋى مۇمكىن دەپ ايتىلىپ ءجۇر. ءتىپتى قوس تاراپ ءۇشىنشى ايقاستى وتكىزۋگە قارسى ەمەستىگىن جەتكىزدى...
- گولوۆكين مەن «كانەلو» ايقاسى بولماۋى دا مۇمكىن. الۆارەس رينگ تورىنە ءجيى شىعىپ ءجۇر. ال گەنا بولسا سوڭعى رەت بىرەر جىل بۇرىن سىنعا ءتۇستى. ەكەۋى كەزدەسكەننىڭ وزىندە ءبىرازدان بەرى جەكپە-جەك وتكىزبەي جۇرگەن قازاقستاندىق بىلعارى قولعاپ شەبەرىنە قيىن بولارى ءسوزسىز.
ەسكە سالايىق، 7- مامىر لاس-ۆەگاستا (ا ق ش) ەكىنشى ورتا ديۆيزيوندا ابسوليۋت چەمپيون مەكسيكالىق ساۋل الۆارەس پەن جارتىلاي اۋىر سالماقتا WBA چەمپيونى رەسەيلىك دميتري بيۆول قولعاپ تۇيىستىرەدى.
ال IBF جانە IBO بەلبەۋلەرىنىڭ يەگەرى قازاقستاندىق گەننادي گولوۆكين (41-1-1، 36 ك و) بولسا، 9- ءساۋىر كۇنشىعىس ەلىندە جەرگىلىكتى WBA «سۋپەرچەمپيونى» ريوتا مۋراتامەن (16-2، 13 ك و) جۇدىرىقتاسادى.
