تاشكەنتتە يراننىڭ ش ى ۇ- عا كىرۋ الگوريتمى كەلىسىلدى
قۇجاتتا يراندىق تاراپتىڭ ش ى ۇ- عا مۇشە مەملەكەت مارتەبەسىن الۋ جونىندەگى مىندەتتەمەلەرى تۋرالى مەموراندۋم جوباسى ماقۇلداندى، دەپ حابارلايدى قازاقپارات ءتىلشىسى.
«يران سياقتى مەملەكەتتىڭ ش ى ۇ- ىنا كىرۋى «گەوگرافيالىق جاۋاپكەرشىلىكتى» ارتتىرادى، ايماقتىق ىنتىماقتاستىقتى دامىتۋ ءۇشىن جاڭا پەرسپەكتيۆالار اشادى. ءبىزدىڭ ۇيىم ۇلان-عايىر ەۋرازيالىق كەڭىستىكتە كەڭ قۇرلىقتىق ىنتىماقتاستىققا سەنىمدى قادام باسىپ كەلەدى. بۇل ايماقتىق جانە جاھاندىق كۇن تارتىبىندەگى وزەكتى ماسەلەلەرگە جاڭاشا كوزقاراسپەن قاراۋعا مۇمكىندىك بەرەتىنى ءسوزسىز»، - دەدى وزبەكستان سىرتقى ىستەر ءمينيسترىنىڭ ورىنباسارى ۆلاديمير نوروۆ. ش ى ۇ باس حاتشىسى چجان مين بەينە ۇندەۋدە تاراپتارعا يراندى ش ى ۇ- عا قابىلداۋعا باعىتتالعان قۇجاتتاردى كەلىسۋ بويىنشا جاقسى ۇيلەستىرىلگەن جۇمىسى ءۇشىن العىس ءبىلدىردى.
ول حاتتاماعا قول قويۋدىڭ وتكەن جىلى سەگىز مەملەكەت باسشىلارىنىڭ دۋشانبەدەگى ش ى ۇ سامميتىندە يراندى ۇيىمعا مۇشەلىككە قابىلداۋ ءراسىمىن باستاۋ تۋرالى شەشىمىن جۇزەگە اسىرۋ جولىنداعى پراكتيكالىق قادام ەكەنىن اتاپ ءوتتى.
بۇل ۇدەرىستىڭ كەلەسى كەزەڭى بيىلعى جىلدىڭ قىركۇيەك ايىندا سامارقاندتا وتەتىن ش ى ۇ ءسامميتى اياسىندا مىندەتتەمەلەر تۋرالى مەموراندۋمعا قول قويۋ جانە وسى مىندەتتەمەلەردى ورىنداۋ بولماق.
وسىدان كەيىن ۇيىمعا مۇشە ەلدەردىڭ باسشىلارى يرانعا ش ى ۇ- عا مۇشە مەملەكەت مارتەبەسىن بەرۋ ماسەلەسىن قاراستىرادى. شاراعا ش ى ۇ- نىڭ تۇراقتى جۇمىس ىستەيتىن ورگاندارىنىڭ باسشىلارى، مۇشە مەملەكەتتەردىڭ ۇلتتىق ۇيلەستىرۋشىلەرى، سونداي-اق تاشكەنتتەگى ديپلوماتيالىق ميسسيالاردىڭ باسشىلارى مەن وكىلدەرى قاتىستى.
