ساداق اتۋدان رەسپۋبليكالىق تۋرنيردە قاراعاندىلىق بالالار ەكى التىن الدى
7 جاستان 18 جاسقا دەيىنگى بالالار وزدەرىنىڭ مەرگەندىك ونەرىن پاش ەتتى، دەپ حابارلايدى قازاقپارات ءتىلشىسى.
ۇلتتىق سپورت تۇرىنەن بىرىنشىلىك ءتورت جاس ساناتى بويىنشا ءوتتى: 7 دەن 9 عا دەيىن، 10 نان 12 گە دەيىن، 13 تەن 15 كە دەيىن جانە 16 دان 18 جاسقا دەيىن. سونىمەن قاتار، توپتار ۇلدار مەن قىزدارعا ءبولىندى. مەرگەندەر ءۇش باعىتتا جارىستى. جاس سپورتشىلار وليمپيادالىق (ف ي ت و)، تۇرىك (پ ۋ ت و) جانە قازاق (جامبى) نىسانالارىنا وق اتتى. مامانداردىڭ ايتۋىنشا، سوڭعىسى ەڭ قيىنى بولدى.
«ساداق اتۋ سوڭعى 2-3 جىلدا جاڭادان قارقىن الا باستادى. بۇگىن قاتىسۋشىلاردىڭ سانى كوپ بولعانى قۋانتىپ وتىر. قىزۋ شايقاستار 10-12 جاس ساناتىنداعى جاسوسپىرىمدەر اراسىندا ءوتتى. بالالار سپورتقا قىزىعۋشىلىقپەن بارادى. كوپشىلىگىندە ساداققا دەگەن قۇشتارلىق بار. ولار قانشالىقتى كوپ جاتتىقسا، قۇلشىنىستارى سونشالىقتى كوبىرەك ويانادى»، - دەيدى جارىس تورەشىسى، ساداق اتۋدان قازاقستان چەمپيونى ايىم تىلەپبەرگەن.
جارىس قورىتىندىسى بويىنشا الماتى، نۇر- سۇلتان قالالارى مەن ماڭعىستاۋ وبلىسىنىڭ قاتىسۋشىلارى ەڭ كوپ مەدال جەڭىپ الدى. قاراعاندىلىق سپورتشىلار ولارعا جاقسى باسەكەلەس بولا ءبىلدى. وسىلايشا قورجىنعا ەكى التىن، ءبىر كۇمىس جانە ءتورت قولا مەدال جينادى.
