استانالىقتار ءۇشىن الەۋمەتتىك تولەماقىنىڭ كولەمىن ارتتىرۋ ۇسىنىلدى

نۇر-سۇلتان. قازاقپارات - ەلوردادا الەۋمەتتىك قولداۋعا مۇقتاج جاندارعا بەرىلەتىن تولەمنىڭ كولەمىن ارتتىرۋ ۇسىنىلدى، دەپ حابارلايدى قازاقپارات ءتىلشىسى.

الەۋمەتتىك مۇقتاج جاندارعا بەرىلەتىن تولەماقى كولەمىن ارتتىرۋ باستاماسىن نۇر-سۇلتان قالاسى جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ مىندەتىن اتقارۋشى يليا سكۋب كوتەردى.

«قۇرمەتتى دەپۋتاتتار سىزدەردىڭ نازارلارىڭىزعا استانا قالاسى ءماسليحاتىنىڭ 2017-جىلعى 12 - جەلتوقسانداعى 221/25-VI№ شەشىمىنە سايكەس قابىلدانعان الەۋمەتتىك كومەك كورسەتۋ، ونىڭ مولشەرلەرىن بەلگىلەۋ جانە مۇقتاج جانداردىڭ جەكەلەگەن ساناتتارىنىڭ تىزبەسىن ايقىنداۋ تۋرالى قاعيداعا وزگەرىس ەنگىزۋ ۇسىنىلادى.

جاڭا قاعيداعا سايكەس مۇقتاج جاندارعا الەۋمەتتىك كومەك كولەمىن 90 ا ە ك- تەن (ايلىق ەسەپتىك كورسەتكىش) 130 ا ە ك- كە دەيىن كوبەيتۋ ۇسىنىلىپ وتىر. ول ءۇشىن بيۋجەتتەن قوسىمشا 18,4 ميلليون تەڭگە قاجەت»، - دەدى يليا سكۋب ەلوردا ءماسليحاتىنىڭ وتىرىسىندا.

سونداي-اق، باسقارما باسشىسىنىڭ مىندەتىن اتقارۋشى دەپۋتاتتاردان اتالعان باستامانى قولداۋىن سۇرادى.

«وتكەن جىلى اتالعان الەۋمەتتىك كومەك ەلوردادا 163 ادامعا كورسەتىلدى. جۇمسالعان سوما 42,7 ميلليون تەڭگە. بيىل جىل باستالعالى الەۋمەتتىك كومەككە مۇقتاج جانداردان 73 ءوتىنىم كەلىپ ءتۇستى. ونىڭ ىشىندە 51 جاننىڭ ءوتىنىشى بويىنشا الەۋمەتتىك تولەم جاسالدى. ول ءۇشىن 13,7 ميلليون تەڭگە ءبولىندى. قالعان 23 ءوتىنىم قارالىپ جاتىر. بىلتىر جالپى سانى 200 استانالىق وتباسى قامتىلدى. بيىل كورسەتىلەتىن الەۋمەتتىك كومەكتى 200-250 وتباسىعا دەيىن ءوسىرۋ جوسپارلانىپ وتىر. كومەككە مۇقتاج جانداردىڭ سانى ارتقان جاعدايدا قوسىمشا بيۋجەتتەن قارجى قاراستىراتىن بولامىز»، - دەيدى ول.