تۇركىستانعا ارنايى كەلگەن پولشا ەلشىسى قازاق حالقىنا العىس ايتتى
تۇركىستانعا پولشا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى سەليم حازبيەۆيچ جۇمىس ساپارىمەن كەلدى.
ول الدىمەن تۇركىستان وبلىسى اكىمىنىڭ ورىنباسارى راشيد ايۋپوۆپەن كەزدەسىپ، ەكىجاقتى ارىپتەستىك جونىندەگى ماسەلەلەردى تالقىلادى.
راشيد ايۋپوۆ ەلشىگە تۇركىستان وبلىسىن دامىتۋ باعىتىنداعى جۇمىستاردى بايانداپ، ەكونوميكالىق بايلانىستار مەن ارىپتەستىكتى نىعايتۋ جونىندەگى ويلارىن ايتتى.
تۇركىستاندا ينۆەستيتسيا سالۋعا قولايلى جاعداي جاسالعانىنا توقتالىپ، پولشا ەلىنىڭ كاسىپكەرلەرىنىڭ قاتىسۋىمەن بيزنەس-فورۋم وتكىزۋ جونىندەگى ۇسىنىسىن جەتكىزدى.
سەليم حازبيەۆيچ تۇركىستان قالاسىندا وڭ وزگەرىستەردى اڭعارعانىن ايتتى.
- شاھارلارىڭىزعا ەكىنشى رەت كەلىپ تۇرمىن. دامىپ جاتقانى بايقالادى. پولشا مەن قازاقستان اراسىندا وتە تىعىز دوستىق قارىم-قاتىناس ورناعان. كاسىپكەرلىك سالاسىنداعى بايلانىستى نىعايتۋعا دا مۇمكىندىك بار. بيزنەس-فورۋم وتكىزۋ تۋرالى ۇسىنىسىڭىزدى قولدايمىن. بۇل ماسەلەگە ارنايى توقتالىپ، جۇزەگە اسىرۋعا كۇش سالامىز، - دەگەن ەلشى پولياك پەن قازاق حالىقتارى اراسىنداعى تاريحي ساباقتاستىق جونىندە وي قوزعادى.
- مەن بىرىنشىدەن، قازاق حالقىنا العىس ايتامىن. تۇركىستانعا كەلۋدەگى باستى ماقساتىم دا - پولياك حالقىنىڭ قازاقستان جۇرتشىلىعىنا دەگەن ىستىق ىقىلاسى مەن العىسىن جەتكىزۋ. وتكەن عاسىرداعى قيىن كەزەڭدەردە قازاق دالاسىنا مىڭداعان پولياك ازاماتى كۇشتەپ كوشىرىلدى. قازاق حالقى ولاردى قۇشاق جايا قارسى الىپ، ءبىر ناندى ءبولىسىپ جەپ، قامقورلىق تانىتتى. تۇركىستان وڭىرىندە دە پولياك حالقىنىڭ وكىلدەرىنىڭ زيراتتارى بار. وسى تاريحي ورىنداردى تابۋعا كومەكتەسىپ، ءبىزدىڭ تاريحشىلارمەن تىعىز بايلانىستا جۇمىس اتقارعان ازاماتتارعا پولشا ەلىنىڭ «Opiekun Miejsc Pamyęci Narodowej» مەدالىن تاپسىرۋعا رۇقسات ەتىڭىزدەر، - دەگەن ول.
سونداي-اق، ەلشى ۇلتتىق ەسكەرتكىشتەردى قورعاۋعا ۇلەس قوسقان كەنتاۋ قالاسىنىڭ تۇرعىندارى راسىلبەك وتكەلبايەۆ پەن سالتانات دۇيسەنوۆانى ارنايى ماراپاتتادى.
كەزدەسۋ بارىسىندا پولشانىڭ ەلىمىزدەگى توتەنشە جانە وكىلەتتى ەلشىسى سەليم حازبيەۆيچكە تۇركىستان وبلىسى اتىنان ەستەلىك سىيلىقتار تاپسىرىلدى.
قوناقتار دا ەستەلىك سىيلىعىن ۇسىنىپ، ەكىجاقتى بايلانىستى تەرەڭدەتە تۇسۋگە ۋاعدالاستى.
