وڭتۇستىك كورەيادا جاڭا پرەزيدەنتتىڭ كەلۋىمەن قانداي وزگەرىستەر بولۋى مۇمكىن
ەندى بيلىك باسىنا قازىرگى پرەزيدەنت مۋن دجە يننىڭ وپپوزيتسياسى كەلىپ وتىر. كورەياداعى باستى ساياسي دودا جايىندا ارنا ءتىلشىسى ۆلاديسلاۆ سوي تىكەلەي بايلانىسقا شىعىپ، جاڭا پرەزيدەنتتىڭ كەلۋىمەن وڭتۇستىك كورەيانىڭ سىرتقى جانە ىشكى ساياساتىندا قانداي وزگەرىستەر بولۋى مۇمكىن دەگەن ساۋالدارعا تولىعىراق جاۋاپ بەردى.
ۆلاديسلاۆ سوي، ءتىلشى:
- ونىڭ جەڭىسكە جەتۋىنىڭ باستى فاكتورىنىڭ ءبىرى - وزگە وپپوزيتسيالىق پارتيانىڭ كانديداتى ان چول سۋمەن بىرىگۋى بولدى. بۇل يۋن سوك يەلگە وڭتۇستىك كورەيانىڭ پرەزيدەنتتىك سايلاۋ تاريحىندا العاش رەت از عانا داۋىسپەن جەڭىسكە جەتۋىنە كومەكتەستى. ونىڭ لي دجە ميەنمەن داۋىس ايىرماشىلىعى 0,73 پروتسەنت قانا. ۇلتتىق سايلاۋ كوميسسياسىنىڭ مالىمدەۋىنشە، يۋن سايلاۋشىلاردىڭ 48,56 پروتسەنت داۋىسىنا يە بولدى. 60 جاستاعى ساياساتكەر جاڭا ۇكىمەتتى ءوزىنىڭ وداقتاسى ان چحول سۋمەن بىرگە قۇراتىنىن ايتادى. سوندىقتان ان چحول جاڭا پرەزيدەنت اكىمشىلىگىندە نەمەسە مينيسترلەر كابينەتىندە ءبىر لاۋازىمعا يە بولۋى مۇمكىن. يۋن وسىلايشا ءوزىنىڭ وداقتاسىنا العىسىن بىلدىرمەك.
اندرەي لانكوۆ، كورەيتانۋشى:
- ان چول سۋ مەن يۋن سوك يەلدىڭ بىرىگۋى مۇمكىن دەگەن بولجام ءبىر اي بويى ايتىلعان. وڭشىلداردىڭ اراسىندا يۋن سوك يەل جەڭىسكە جەتىپ جاتسا، سايلاۋعا جالعىز ءتۇسۋى كەرەك دەگەن دە پىكىرلەر بولدى. ال جەڭىسكە جەتۋىنە از دا بولسا كۇمان تۋسا، ان چول سۋمەن كەلىسۋ كەرەك. بۇل قوسىمشا داۋىس سانىن بەرەدى. وسىلايشا وڭشىلدار تاۋەكەلگە بارىپ، ان چول سۋدى ءوز كومپانياسىنا الاتىن بولدى.
يۋن سوك يەل قازىرگى پرەزيدەنت مۋن دجە يننىڭ ساياساتىنا قارسى كوزقاراستارىمەن تانىمال. يۋن باس پروكۋرور بولىپ تۇرعاندا جوعارعى بيلىكتە سىبايلاس جەمقورلىق بارىن ايتىپ، ءتىپتى مۋنعا قارسى تەرگەۋ جۇرگىزەتىنىن ەسكەرتكەن. ال سايلاۋشىلار يۋننان جىلجىمايتىن مۇلىك باعاسىن تومەندەتۋدى سۇراپ وتىر. قازىرگى مەملەكەت باسشىسى دا وسى ماسەلەنى شەشە الماعانى ءۇشىن سايلاۋشىلاردىڭ سىنىنا ۇشىراعان. سوندىقتان يۋن سوك يەل سايلاۋ ناۋقانى بارىسىندا الداعى 5 جىلدا 2,5 ميلليون تۇرعىن ءۇي تۇرعىزۋعا جانە جىلجىمايتىن مۇلىك سالىعىن تومەندەتۋگە ۋادە بەردى. ال سىرتقى ساياساتتا يۋن وداقتاسى ا ق ش- قا سۇيەنەتىن بولادى. ول وڭتۇستىك كورەيادا ا ق ش- تىڭ زىمىرانعا قارسى جۇيەسىنىڭ قوسىمشا جاساقتارىن ورنالاستىرۋعا نيەتتى.
اندرەي لانكوۆ، كورەيتانۋشى:
- قىتاي، سولتۇستىك كورەيا، ءتىپتى رەسەيمەن اراداعى قارىم- قاتىناس بۇزىلۋى مۇمكىن. ويتكەنى كونسەرۆاتورلاردىڭ رەسمي تۇردە جاريالاعان ساياساتى بويىنشا سولتۇستىكپەن ەشقانداي بايلانىس بولمايدى. ماسەلەن، بۇل ەلدەر كەز كەلگەن كەلىسىمدى بۇزادى دەلىنگەن. سوندىقتان سولتۇستىك كورەيانى وزىنەن الشاق ۇستاپ، ولارمەن ورتاق ءىستىڭ بولماعانى ابزال.
سونىمەن قاتار يۋن سوك يلدىڭ امەريكاعا وڭ ۇستانىمى دا ونىڭ ساياساتىنا اسەر ەتۋى مۇمكىن. كورەي قوعامىنداعى قىتايعا دەگەن جاعىمسىز كوزقاراس تا ۋشىعۋى ىقتيمال.
ۆلاديسلاۆ سوي، ءتىلشى:
- يۋن سوك يلدىڭ بارلىق جاڭا شەشىمدەرى وپپوزيتسيانىڭ قارسىلىعىنا تاپ بولاتىنى انىق. سەبەبى وپپوزيتسيالىق پارتيا پارلامەنتتە كوپشىلىك ورىنعا يە. ال بيلىككە كەلگەن «حالىق كۇشى» 300 ورىندىق ۇلتتىق اسسامبلەيانىڭ تەك 110 ورنىنا يەلەنگەن. تاعى ايتا كەتەتىن جايت، يۋن ءوزىنىڭ مىندەتتەرىن ورىنداۋعا 2 ايدان كەيىن كىرىسەدى. ال ونى ۇلىقتاۋ ءراسىمى مامىر ايىندا وتەدى.
www.24.kz
