ۆيتسە- مينيستر حالىقتى اۋىلدا تۇرۋعا قالاي ىنتالاندىراتىنىن ايتتى

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى. «اۋىلدىق جەرلەردە تۇرعىن ءۇي ماسەلەسىن شەشۋ ءۇشىن اۋىلدا جالعا بەرىلەتىن ۇيلەر سالۋ كەزىندە جۇمىس بەرۋشىلەردىڭ شىعىندارىن سۋبسيديالاۋ تەتىگىن ەنگىزۋ ۇسىنىلادى. بۇل جۇمىس بەرۋشىلەردى ءوز جۇمىسكەرلەرى ءۇشىن تۇرعىن ءۇي سالۋعا ىنتالاندىراتىن بولادى. بۇل ولاردىڭ اۋىلدىق جەرلەردە تۇرۋعا مۇددەلىلىگىن ارتتىرادى جانە حالىقتىڭ قالالارعا جاپپاي كەتۋىن تەجەپ، اۋىلدىق جەرلەرگە بىلىكتى مامانداردى تارتۋعا مۇمكىندىك بەرەدى. سۋبسيديالاۋعا ءۇي پايدالانۋعا بەرىلگەننەن كەيىن ونىڭ قۇنىنىڭ % 50- ى مولشەرىندە جانە جالپى اۋدانى 100 شارشى مەتردەن اسپايتىن، قۇنى 10 ميلليون تەڭگەدەن اسپايتىن جۇمىس بەرۋشىلەردىڭ شىعىندارى جاتادى. تۇرعىن ءۇي جۇمىس بەرۋشى مەن جۇمىسكەر اراسىندا 5 جىلدىق مەرزىمگە جاسالعان ەڭبەك شارتى بولعان كەزدە ۇسىنىلادى»، - دەدى مينيسترلىك وكىلى.
ونىڭ ايتۋىنا قاراعاندا، بۇگىنگى تاڭدا وڭىرلەردە 2855 تۇرعىن ءۇيدىڭ قۇرىلىسىن باستاۋ جوسپارلانعان.
«اتالعان جاڭاشىلدىقتاردى ىسكە اسىرۋ ءۇشىن 4 كودەكس پەن 19 زاڭعا وزگەرىستەر مەن تولىقتىرۋلار ەنگىزۋ قاجەت. تۇتاستاي العاندا، جوعارىدا كورسەتىلگەن شارالار حالىقتى تۇرعىن ۇيمەن قامتاماسىز ەتۋدىڭ تيىمدىلىگىن ارتتىرۋعا، ازاماتتاردىڭ تۇرعىن ءۇيىن الۋ ءراسىمىن وڭتايلاندىرۋعا، سونداي- اق ازاماتتاردىڭ بارلىق ساناتتارى اراسىندا تۇرعىن ءۇيدى ءادىل ءبولۋدىڭ ءبىرىڭعاي تەتىگىن ەنگىزۋگە مۇمكىندىك بەرەدى»، - دەدى ەركەبۇلان داۋىلبايەۆ.
اۆتور: ەسىمجان ناقتىباي