13:40, 10 - ناۋرىز 2022 | GMT +5
قازاقستاننىڭ سولتۇستىك وڭىرلەرىنە رەسەيدەن قاۋىپ ءتونۋى مۇمكىن بە - مۇحتار تىلەۋبەردى جاۋاپ بەردى
نۇر-سۇلتان. قازاقپارات - قازاقستاننىڭ سولتۇستىك وڭىرلەرىنە رەسەيدەن قاۋىپ ءتونۋى مۇمكىن ەمەس.
بۇل جايىندا ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى.
ۇكىمەت وتىرىسىنان كەيىن ب ا ق وكىلدەرى ۆيتسە-پرەمەردەن ەلىمىزدىڭ سولتۇستىك وڭىرلەرىنە قاۋىپ ءتونۋى مۇمكىن بە دەپ سۇراعان بولاتىن.
«بۇل مۇمكىن ەمەس. مەملەكەتتەرىمىزدىڭ اراسىندا قاجەتتى قۇقىقتىق بازا بار. شەكارامىز دەليميتاتسيادان ءوتتى. قازىر دەماركاتسيا پروتسەسى ءجۇرىپ جاتىر. دەماركاتسيا پروتسەسى 2-3 جىلدىڭ ىشىندە جاسالادى»، - دەپ جاۋاپ بەردى مۇحتار تىلەۋبەردى.
سونىمەن قاتار ول مەملەكەت باسشىسى قاسىم-جومارت توقايەۆتىڭ ماسكەۋگە جۇمىس ساپارى بارىسىندا رەسەي تاراپىنان قازاقستانعا جەرگە قاتىستى ەشقانداي تالاپ بولمايتىندىعى ەڭ جوعارى دەڭگەيدە راستالعانىن اتاپ ءوتتى.
