قازاقستاندا باسپانا كەزەگىندە قانشا ازامات تۇر
«بۇگىنگى تاڭدا ءۇيدى باسقارۋ تۋرالى شەشىم قابىلداۋدا مۇلىك يەلەرىنىڭ بەلسەندىلىگى تومەندەگەنى بايقالادى. بۇعان سەبەپ - داۋىس بەرۋ ءراسىمىنىڭ قيىندىعى جانە ەلەكتروندىق قىزمەتتەردىڭ شەكتەۋلى بولۋى. وسى رەتتە ەلەكتروندىق داۋىس بەرۋ تاسىلدەرىن كەڭەيتۋ قاجەت. بۇل سەرۆيستىك كومپانيالاردى تاڭداۋ ءراسىمىن وڭايلاتادى. وسىلايشا، باسەكەلەستىك ورتانى قالىپتاستىرۋ جانە قىزمەتتەر قۇنىنىڭ اشىقتىعىن قامتاماسىز ەتۋ ارقىلى تۇرعىن ءۇي- كوممۋنالدىق شارۋاشىلىعى سالاسىنداعى سەرۆيستىك قىزمەتتەر باعاسىنىڭ ءوسۋىن تەجەۋگە بولادى»، - دەدى ۆيتسە-مينيستر. جالپى، ونىڭ اتاپ وتۋىنشە، ازاماتتاردىڭ تۇرعىن ءۇي ماسەلەلەرى - وتە وتكىر جانە الەۋمەتتىك ماڭىزدى.
«بۇگىنگى تاڭدا تۇرعىن ءۇي كەزەگىندە 590 مىڭ ازامات تۇر. ونىڭ ىشىندە 69,3 مىڭ الەۋمەتتىك وسال جاعدايداعى ازاماتتار بار. وسى مۇقتاج جانداردى قولداۋ ءۇشىن ولارعا مەملەكەت قاراجاتى ەسەبىنەن نارىقتان باسپانانى جالعا الۋ قۇنىنىڭ جارتىسىن وتەۋ ۇسىنىلادى. ينفراقۇرىلىمدىق جوبالاردى ودان ءارى ىسكە اسىرۋ ءۇشىن 160 مىڭعا دەيىن جەكە جەر ۋچاسكەسىنە قاجەتتى ينجەنەرلىك ينفراقۇرىلىم جۇرگىزىلەدى»، - دەدى مارات قارابايەۆ.
