الماتى وبلىسىندا كولىگىمەن ادام قاعىپ، قاشىپ كەتكەن جۇرگىزۋشى ۇستالدى

تالدىقورعان. قازاقپارات - الماتى وبلىسىندا كولىگىمەن ادام قاعىپ، قاشىپ كەتكەن جۇرگىزۋشى ۇستالدى. كۇدىكتىنىڭ ۇستىنەن قىلمىستىق كودەكستىڭ ەكى بابى بويىنشا ءىس قوزعالدى، - دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 20- اقپان كۇنى تالدىبۇلاق- اقبۇلاق جولىندا 33 جاستاعى ادامدى كولىك قاعىپ كەتكەن. جابىرلەنۋشى اۋرۋحاناعا جەتكىزىلگەنىمەن بىرنەشە كۇننەن سوڭ جانساقتاۋ بولىمىندە كوز جۇمعان. پوليتسەيلەر وقيعا ورنىندا كولىكتىڭ قالدىقتارىن تاۋىپ، 28 جاستاعى كۇدىكتىنى انىقتاپ، ۇستادى.

«قازىر ق ر ق ك 345 جانە 347- باپتارى بويىنشا ءىس قوزعالىپ، تەرگەۋ ءجۇرىپ جاتىر. كۇدىكتى ادامدى قاعىپ، وقيعا ورنىنان قاشىپ كەتكەنىن مويىندادى. كولىك ايىپ تۇراعىنا قويىلدى. قاجەتتى سوت- مەديتسينالىق ساراپتامالار تاعايىندالدى»، - دەلىنگەن اتالعان ۆەدومستۆو تاراتقان حابارلامادا.

ايتا كەتەيىك، كولىك قاعىپ مەرت بولعان 33 جاستاعى ەر ادام الماتى قالاسىنىڭ تۇرعىنى.

اۆتور: سامال قابىشيەۆا