بىرىككەن كورولدىك رەسەي مۇنايىنان تولىق باس تارتادى

تاشكەنت. قازاقپارات - بىرىككەن كورولدىك رەسەي مۇنايىنان تولىق باس تارتۋدى كوزدەيدى. ءبىراق اسىعىس- ۇسىگىس ەشتەڭە جوق. بريتانيالىقتاردىڭ جوسپارى كەزەڭ- كەزەڭىمەن جىلدىڭ سوڭىنا دەيىن جۇزەگە اسۋعا ءتيىس.

وسى ارالىقتا ۇكىمەت تاۋار تاسىمالىن رەتتەيدى. ال ساراپشىلار ، مۇناي نارىعىنداعى جاعداي قازىردىڭ وزىندە حالىقتىڭ كۇنكورىس دەڭگەيىن تومەندەتىپ بارادى دەپ الاڭداپ وتىر.

ۇلى بريتانيا مۇناي جانە مۇناي ونىمدەرىنىڭ 8 پروتسەنتىن، تابيعي گازدىڭ 4 پروتسەنتىن رەسەيدەن الادى. ال نەگىزگى تاسىمالداۋشىلارى: ا ق ش، نيدەرلاندى جانە پارسى شىعاناعى ەلدەرى. جىلدىڭ سوڭىنا تامان رەسەيلىك يمپورتتىڭ ورنىن وسى مەملەكەتتەر تولتىرماق.

بۇعان قوسا، ۇلى بريتانيانىڭ ءوزى مۇناي جانە مۇناي ونىمدەرىنىڭ ءىرى ءوندىرۋشىسى ەكەندىگى بەلگىلى، ءارى قويمالارىندا ايتارلىقتاي قورى بار. سونىمەن قاتار بيلىكتەگىلەر سولتۇستىك تەڭىزدەگى ءىرى گاز كەن ورىندارىن يگەرۋدى قولعا الۋدى جوسپارلاپ وتىر.

بوريس دجونسون، ۇلى بريتانيا پرەمەر ءمينيسترى:

- جىل سوڭىنا دەيىن رەسەي مۇناي ونىمدەرىن بريتان نارىعىنان ىعىستىرامىز. جەرگىلىكتى بيزنەس، ءوندىرىس، كولىك تاسىمالى جانە ونەركاسىبىمىز بۇل باستامادان زارداپ شەكپەيدى. ءبىراق ۆلاديمير پۋتين رەجيمىن السىرەتەدى. رەسەيگە شەتەلدەن كەلەتىن كىرىستىڭ 44 پروتسەنتى مۇناي مەن گازدان تۇسەتىنىن ۇمىتپاڭىزدار.

الەم نارىعىنداعى مۇنايدىڭ باعاسى، سايكەسىنشە جانار ماي قۇنى كۇرت قىمباتتاپ، وتكەن جىلمەن سالىستىرعاندا 24 پروتسەنتكە ءوستى. بۇل سوڭعى 13 جىلدا بولماعان جاعداي دەيدى ساراپشىلار.

مارتين ليۋيس، قارجى ساراپشىسى:

- مۇنايدىڭ قىمباتتاۋى تەك جانار ماي قۇنىنا عانا اسەر ەتىپ قويمايدى. ول تاۋار تاسىمالىنا، سايكەسىنشە ازىق- تۇلىك باعاسىنا دا ىقپال ەتەدى. ەگەر بۇل اسكەري قاقتىعىس ۇزاققا سوزىلاتىن بولسا، كوپتەگەن زاتتار قىمباتتايدى. ناتيجەسىندە، قاراپايىم حالىق كەدەيلەنە تۇسەدى.

ۋكرايناداعى جاعداي بريتانيالىقتاردىڭ ءومىر ءسۇرۋ دەڭگەيىن ءالى دە تومەندەتەدى دەگەن بولجام بار. الداعى جىلى حالىقتىڭ تابىسى 4 پروتسەنتكە ازايىپ، ينفلياتسيا دەڭگەيى 8,4 پروتسەنتكە ءوسۋى مۇمكىن. بۇل ۇلى بريتانيا ءۇشىن برەكسيت پەن پاندەميادان كەيىنگى تاعى ءبىر اۋىر سوققى بولايىن دەپ تۇر.

www.24.kz