قاراعاندى وبلىسىندا ەگىس القابى ۇلعايتىلادى
اگرارشىلار ءداندى جانە جەم- ءشوپ داقىلدارىن، كوپجىلدىق شوپتەردى ەگۋدى ۇلعايتادى. سونداي- اق كارتوپ جانە كوكونىس القاپتارى دا ۇلعايتىلادى، دەپ حابارلايدى قازاقپارات ءتىلشىسى.
كوكتەمگى دالا جۇمىستارىنا دايىندىق ونلاين رەجيمىندە اپپاراتتىق كەڭەستە تالقىلاندى. اۋىل شارۋاشىلىعى باسقارماسىنىڭ باسشىسى اسقار ساناۋباروۆتىڭ اقپاراتى بويىنشا، بيىل 977,5 مىڭ گا ءداندى داقىل ەگۋ جوسپارلانعان، كارتوپقا 11,4 مىڭ گا جەر بولىنگەن.
«ونىمدىلىكتىڭ ارتۋى تۇقىم ساپاسىنا بايلانىستى. ەليتا مەن ءبىرىنشى كوبەيتىلگەن تۇقىمداردى پايدالانۋ ۇلعايتىلاتىن بولادى. سونىمەن قاتار، بيىل مينەرالدى تىڭايتقىشتاردى كوبىرەك ساتىپ الۋ جوسپارلانۋدا. بۇل ءوز كەزەگىندە جەردى ۇتىمدى پايدالانۋ ءۇشىن قاجەت»، - دەپ اتاپ ءوتتى اسقار ساناۋباروۆ.
باسقارما باسشىسىنىڭ ايتۋىنشا، اۋىل شارۋاشىلىعى تەحنيكاسىنىڭ باسىم بولىگى دايىندالدى. ەگىس ناۋقانىنا 11 مىڭنان استام تراكتور، 351 ەگىس كەشەنى، 6078 تۇقىم سەپكىش تارتىلاتىن بولادى. اۋىل شارۋاشىلىعى وندىرۋشىلەرى ارزانداتىلعان ديزەل وتىنىن الادى. اگرارلىق نەسيە كورپوراتسياسى ارقىلى مەملەكەتتىك قولداۋ قاراستىرىلعان. كوكتەمگى دالا جۇمىستارىنا دايىندىق بويىنشا وبلىستىق جەدەل شتاب جۇمىس ىستەيدى. وبلىستا ەگىن ەگۋ مامىر ايىنىڭ ەكىنشى ونكۇندىگىندە باستالادى دەپ كۇتىلۋدە.
«ۋاقىتىندا قاجەتتىنىڭ ءبارىن قامتاماسىز ەتۋ، تۇقىمداردىڭ ساپاسىنا تەكسەرۋ جۇرگىزۋ قاجەت. اگروتەحنولوگيالاردى ساقتاۋ ماڭىزدى، مينەرالدى تىڭايتقىشتاردى پايدالانۋدى ارتتىرۋ، سۋارمالى ەگىنشىلىكتى ارتتىرۋ قاجەت. شارۋالاردى ارزانداتىلعان وتىنمەن قامتاماسىز ەتۋ باقىلاۋدا»، - دەپ قورىتىندىلادى وبلىس اكىمى جەڭىس قاسىمبەك.
