قارالى قاڭتار: اسكەري ايەلدەر ونداعان ساربازدى قالاي امان الىپ قالدى
ۇلتتىق ۇلاننىڭ 100 دەن استام كولىگى زاقىمداندى. سول كۇندەرى ەر ازاماتتارمەن بىرگە ايەلدەر دە جاۋىنگەرلەردىڭ ءومىرى ءۇشىن كۇرەستى. ولار جارالانعان اسكەري قىزمەتشىلەرگە مەديتسينالىق كومەك كورسەتتى. باسىم بولىگى بۇلىكشىلەرگە قارسى تۇردى.
ەرلىك جاساعان الماتىلىق باتىر قىزدار تۋرالى قازاقپارات ءتىلشىسىنىڭ ماتەريالىندا.
ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى اسكەري بولىمىندە 400 دەن استام اسكەري قىزمەتشى ايەل قىزمەت ەتەدى.
بۇگىن ءبىز ومىرىنە قاۋىپ ءتونىپ تۇرسا دا ازاماتتىق جانە اسكەري بورىشىن سوڭىنا دەيىن اتقارعان بىرنەشە ايەلدىڭ ەرلىگى تۋرالى ايتپاقپىز.
ق ر ۇلتتىق ۇلاننىڭ 5571 اسكەري ءبولىمىنىڭ فەلدشەر-سەرجانتى راشيدا سالمەكەيەۆا قاڭتاردىڭ 4 نەن 5 نە قاراعان ءتۇنى الماتىدا جاپپاي تارتىپسىزدىكتىڭ الدىن الۋ جونىندەگى جاۋىنگەرلىك تاپسىرمانى ورىنداۋ ءۇشىن جەدەل جاردەم كولىگىندە كەزەكشىلىك ەتتى.
ولار نازاربايەۆ پەن قابانباي باتىر كوشەلەرىنىڭ قيىلىسىندا زارداپ شەككەن ساربازداردى ەۆاكۋاتسيالادى.
ونىڭ ايتۋىنشا، كولىككە شابۋىل جاسالعان.
«ماشينانى ازاماتتىق كولىك سوعىپ، سوسىن نارازىلىق بىلدىرۋشىلەر شابۋىلدادى. ولار كولىكتىڭ تەرەزەسىن سىندىردى. سوسىن بىرەۋى قولىن تەرەزەگە كىرگىزىپ، شاشىمنان ۇستاپ، تارتا باستادى. مەن اۋەلى ءبىزدى كولىكتەن شىعارۋىن ءوتىندىم. باقىتىمىزعا وراي، ءبىز جاراقات العان ساربازدارمەن بىرگە قاشىپ ۇلگەردىك. كولىكتى كوزىمىزشە ورتەپ جىبەردى»، - دەپ ەسكە الادى ول.
راشيدا باقبەرگەن قىزىنىڭ ۇلتتىق ۇلاننىڭ مەديتسينالىق قىزمەتىندە ەڭبەك ەتكەنىنە بيىل 22 -جىل. ءبىر قىزى مەن جيەن نەمەرەسى بار. 5571 اسكەري ءبولىمىنىڭ پسيحولوگى، مايور دينارا كولبايەۆا 1998-جىلدان بەرى ۇلتتىق ۇلان قاتارىندا.
«جالپى، ۇلتتىق ۇلان قاتارىندا قىزمەت ەتكەنىمە 25 جىل بولدى. قاڭتار وقيعاسى كەزىندە مەدپۋنكت جانىنداعى بولىمشەدە بولدىم. اسكەريلەرگە كومەك كورسەتتىم. ول جەرگە جارالانعان ساربازدار كەلدى. مەنىڭ مىندەتىم - ولاردى ەندى قاۋىپ ءتونىپ تۇرماعانىنا، بار جاماندىق ءوتىپ كەتكەنىنە سەندىرۋ بولدى. پسيحولوگيالىق تۇرعىدان قولداۋ كورسەتتىم. پسيحولوگيالىق كەڭەس بەرىپ، تۇزەتۋ جۇمىسىن جۇرگىزدىم»، - دەيدى پسيحولوگ.
دينارا كولبايەۆا سول كۇندەرى اسكەريلەردىڭ ءارقايسىسى انتىنا ادال بولىپ، بورىشىن ءمىنسىز وتەگەنىن اتاپ ءوتتى. كەيىپكەرىمىزدىڭ ۇلى بار. ول حالىقارالىق بيزنەس ۋنيۆەرسيتەتىنىڭ ءبىرىنشى كۋرس ستۋدەنتى.
ق ر ۇلتتىق ۇلانى 5571 اسكەري ءبولىمىنىڭ كيىم جوندەۋ شەبەرحاناسىنىڭ باستىعى، سەرجانت ءاليا ابەجانوۆا 5- قاڭتار كۇنى ادەتتەگىدەي جۇمىسقا شىققانىن ايتتى. سول كۇنى ايەلدەر جۇمىستان بوساتىلدى، ءبىراق ول قالىپ، دارىگەرلەرگە كومەكتەسۋدى شەشتى.
«سول كۇنى اسكەري بولىمگە جارالى ساربازدار مەن وفيتسەرلەر كەلىپ ءتۇستى. ءبىزدىڭ باتالون كومانديرى جاراقات الىپ الماتى قوناق ءۇيىنىڭ جانىندا جاتىر دەگەن شۇعىل اقپارات الدىق. بوس مامان بولماعاندىقتان مەن بارۋدى ءجون كوردىم. مەنىمەن بىرگە كينولوگيا بولىمىنەن ارىپتەسىم دارحان دارىبايەۆ باردى. ءقوناقۇيدىڭ جانىنان كومانديرىمىزدى تاۋىپ الدىق. ونى كولىككە وتىرعىزىپ، 150 مەتر جۇرگەنەن كەيىن تاعى ءبىر وفيتسەرىمىزدى تاپتىك، ول دا جارالى بولدى. سول كەزدە ارتىمىزدان قولىندا تاياعى بار ءبىر توپ ادام جۇگىردى. مەن جارالانعان وفيتسەردى كولىككە وتىرعىزىپ ۇلگەردىم. جارالىلاردى مەديتسينالىق ورتالىققا جەتكىزدىك»، - دەدى ول.
جارالى اسكەري قىزمەتشىلەردى اسكەري ءبولىمنىڭ مەديتسينالىق پۋنكتىنە قالدىرىپ، ولار قايتادان قالا كوشەلەرىنە شىقتى. بارلىعى 18 گە جۋىق ادامدى امان الىپ قالدى.
«سوڭىندا كينولوگ-ساربازدى تاپتىق. كينولوگ اياعىنان جارالانىپتى. سونىمەن قاتار، قارۋ-جاراق دۇكەنىن توناعانداردى كوردىم. ولار ماعان وق اتتى. مەن كولىكتىڭ ارتىنا تىعىلىپ ۇلگەردىم» - دەيدى كەيىپكەرىمىز.
ءاليانىڭ ەكى بالاسى بار. قىزى 23 جاستا، ۇلى 10 جاستا. 5- ناۋرىزدا جاۋىنگەرلەردى امان الىپ قالعانى ءۇشىن «ۇلتتىق ۇلان قىزمەتىنىڭ ۇزدىگى» توسبەلگىسىمەن ماراپاتتالدى.
ايتا كەتۋ كەرەك، اسكەري بورىشىن وتەۋ كەزىندە بۇل ايەلدەر قورقىنىشقا بوي الدىرعان جوق. ولار ەر ازاماتتارمەن يىق تىرەسىپ، قاتار ءجۇردى، ساربازداردى قيىندىقتا قالدىرماي، قۇتقاردى.
