ۋكراينا- رەسەي كەلىسسوزىنىڭ ءۇشىنشى راۋندى اياقتالدى

تاراپتار بەيبىت تۇرعىنداردى ەۆاكۋاتسيالاۋ بويىنشا لوگيستيكانى تالقىلاپ، وسى ماسەلە بويىنشا ءبىرقاتار كەلىسىمگە كەلدى. ءبىراق جالپى كەلىسسوز ناتيجەسىز اياقتالدى. ماسكەۋ كيەۆپەن كەلىسسوزدى جالعاستىرىپ، تاياۋدا تاعى ۇستەل باسىنا وتىرۋدى قالايتىنىن جەتكىزدى. بەيبىت كەلىسسوزدىڭ كەلەسى راۋندى قاي كۇنى وتەتىنى بۇگىن جاريالانۋى مۇمكىن.
ميحايل پودولياك، ۋكراينا دەلەگاتسياسىنىڭ باسشىسى:
- بەيبىت كەلىسسوزدەردىڭ ءۇشىنشى راۋندى اياقتالدى. ءبىز دە گۋمانيتارلىق دالىزدەردىڭ لوگيستيكاسىنا قاتىستى ءبىرقاتار كەلىسىمگە قول جەتكىزدىك. جاڭا وزگەرتۋلەرگە سايكەس، رەسەي شابۋىلىنان جاپا شەككەن تۇرعىندارعا ءتيىمدى كومەك كورسەتە الاتىن بولدىق. ال اتىستى توقتاتۋ، ءبىتىم، جالپى اسكەري قاقتىعىستاردى توقتاتۋ سياقتى تۇستاردى قامتيتىن ساياسي ماسەلەلەرگە قاتىستى كەلىسسوزدى جالعاستىرامىز.
ۆلاديمير مەدينسكي، رەسەي دەلەگاتسياسىنىڭ باسشىسى:
- بۇگىن ءبىز وتكەن كەزدەسۋدە كەلىسىلگەن، ءبىراق سول بەتى جۇزەگە اسىرىلماعان گۋمانيتارلىق دالىزدەر تۋرالى ۇزاق تالقىلادىق. سەبەبى ۋكراينالىق اسكەريلەر بەلگىلەنگەن اۋدانداردا اسكەري قولباسشىلىعىنىڭ بۇيرىعىن ورىندامادى. وسى كەزدەسۋدەن كەيىن جاسىل دالىزدەر جۇمىس ىستەيدى دەپ سەنەمىز. مۇندا كوپ قۇجات پەن جوبالاردى اكەلدىك. بۇگىن تالقىلانعان كەي ماسەلەلەر بويىنشا كەلىسىمگە كەلىپ، قول قويامىز با دەپ ۇمىتتەنگەن ەدىك. ءبىراق ۋكراينا تاراپى بارلىق قۇجاتتى ساراپتاۋعا الىپ كەتتى. شىنىن ايتۋ كەرەك، بۇل كەزدەسۋدە كۇتكەنىمىزدەي ناتيجەگە قول جەتكىزە المادىق.
www.24.kz