كەستەدەن كارتينا تىگەتىن ايەل: قولىمنان شىققان ءار تۋىندىنىڭ ماعىناسى بار
بۇگىندە سۇيىكتى ءىسىن كاسىپكە اينالدىرىپ، ادال ەڭبەگىمەن ءناپاقاسىن تاۋىپ ءجۇر. قولونەرگە قىزىعۋشىلىق تانىتقان قىز- كەلىنشەكتەرگە ۇستازدىق تا ەتەدى. قازاقپارات ءتىلشىسى 8 - ناۋرىز - حالىقارالىق ايەلدەر كۇنىنە وراي نازيگۇل اۋەلبەكپەن سۇحبات قۇرعان ەدى.
- اڭگىمەمىزدى تىگىنشىلىككە دەگەن قىزىعۋشىلىعىڭىزدىڭ قالاي ويانعانىنان باستاساق.
- 1971 -جىلى قىتاي جەرىندە تۋدىم. ول جاقتا مال شارۋاشىلىعىمەن اينالىسىپ، ءدامحانا اشتىم. تىگىنشىلىك ونەر انامنان دارىدى. باسىندا تەك بوس ۋاقىتتا ەرمەك ءۇشىن كەستە تىگەتىنمىن. ونى تابىس كوزى دە قارامادىم. اتامەكەنگە ورالعانىمىزعا 11 جىل بولدى. كوگەداي اۋىلىنىڭ تىنىس- تىرشىلىگىمەن بىتە قايناسىپ كەتتىك. باسىندا نەمەن اينالىساتىنىمدى ءبىراز ويلاندىم. قازاقتىڭ اتا كاسىبى - ءتورت- تۇلىك عوي. ءىرى قارا ۇستادىق. ينە مەن جىپتە كادەگە جارادى. قالىڭدىقتىڭ جاساۋىن جاساپ، ساتا باستادىم.
- كىلەم، كورپە- جاستىق، كيىم- كەشەك تىگەمىن. ولاردى قازاقى ناقىشتا ويۋمەن ورنەكتەيتىن. قۇدايعا شۇكىر، تاپسىرىستار ءجيى ءتۇسىپ جاتادى. زايسان حالقى عانا ەمەس، باسقا اۋدانداردان دا تاپسىرىس بەرەتىندەر بار. بۇدان بولەك، ءتۇرلى كارتينالار تىككەندى جاقسى كورەمىن.
- وسى جونىندە تولىعىراق ايتىپ بەرسەڭىز. قانداي كارتينالارىڭىز بار؟ ءبىر كارتيناعا شامامەن قانشا ۋاقىت جۇمسايسىز؟
- كارتينانى تەك قىل قالاممەن ەمەس، جىپپەن دە سالۋعا بولادى. بۇل قازاق حالقىنىڭ كونە ونەرى. وكىنىشكە قاراي، قازىرگى جاستار ونى ۇمىتىپ بارادى. قولىمنان شىققان ءار تۋىندىنىڭ ماعىناسى بار. مىسالى، دانا ابايدىڭ پورترەتىن جاسادىم. وعان 2 ايعا جۋىق ۋاقىت كەتتى. ۇلى اقىن ايتقان 5 اسىل ءىس پەن 5 جاماندىقتى قاسىنا جازىپ، قابىرعاعا ءىلىپ قويدىم. بۇنى جاستارعا ۇلگى- ونەگە بولسا ەكەن دەگەن ماقساتپەن ىستەدىم.
«انا مەن بالا» كارتيناسىندا ايەل زاتىنىڭ باۋىر ەتى بالاسىنا دەگەن ماحابباتىن كورسەتۋگە تىرىستىم. ال جىلقى بەينەلەنگەن تۋىندىدا ءتورت تۇلىكتىڭ تورەسىن ەركىندىكتىڭ سيمۆولى رەتىندە ايشىقتاعىم كەلدى. ءبىر كارتيناعا ناقتى وسىنشا ۋاقىت كەتەدى دەپ ايتۋ قيىن. كەم دەگەندە 1ايداي ۋاقىت جۇمسايمىن.
- مەملەكەت تاراپىنان قانداي دا ءبىر كومەك الدىڭىز با؟
- 2018 -جىلى ماعان ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان «ەڭبەك» مەملەكەتتىك باعدارلاماسى اياسىندا قايتارىمسىز گرانت بەرىلدى. سول اقشاعا تىگىن ماشيناسىن ساتىپ الدىم. وسى رەتتە، اۋدان اكىمدىگىنە العىسىمدى بىلدىرگىم كەلەدى. حالىقتىڭ ءوز ءىسىن العا جەتەلەۋىنە وسىلاي كومەك كورسەتىلىپ جاتقانى قۇبا- قۇپ.
- اۋىلداستارىڭىزعا تىگىن تىگۋدى ۇيرەتىپ جۇرگەنىڭىزدى ەستىدىك. الداعى ۋاقىتتا ۇيىرمە اشقىڭىز كەلە مە؟
- ءيا. قىزىعۋشىلىق تانىتقان قىز- كەلىنشەكتەرگە ەش اقىسىز بىلگەنىمدى ۇيرەتۋگە دايىنمىن. بارىنە ەسىگىم اشىق. وسى ۋاقىتقا دەيىن 10نان استام ادامدى شاكىرت ەتتىم. تىگۋ قاعيداسىن ءتۇسىندىرىپ قانا قويماي، بويجەتكەندەرگە قازاقتىڭ كونەدەن كەلە جاتقان مادەنيەتىن، سالت- ءداستۇرىن ايتامىن. ۇيىرمە اشقىم دا كەلەدى. ءبارى ۋاقىت ەنشىسىندە عوي، الداعى ۋاقىتتا ءساتى ءتۇسىپ تە قالار.
- تىگىنشىلىكپەن اينالىسقىسى كەلەتىن ادامنىڭ بويىندا قانداي قابىلەت بولۋى كەرەك؟
- ەڭ ءبىرىنشى - قىزىعۋشىلىق قاجەت. ادام قانداي ىسپەن اينالىسسا دا كوڭىلى قالاماسا ودان ەش ناتيجە شىقپايدى. ودان سوڭ سابىرلىلىق، شىدامدىلىق كەرەك. ءبىر ورىندا تاپجىلماي وتىرۋ وڭاي شارۋا ەمەس. ال كارتينا جاساۋ تىپتەن قيىن. ول ءۇشىن قول قابىلەتى، دالدىك، ەپتىلىك قاجەت. ەشتەڭە ويلاماي بار نازارىڭدى، وي- ساناڭدى سوعان ارنايسىڭ. سوندا عانا كارتينا ءساتتى شىعادى.
- وتباسىڭىز جايلى ايتىپ وتسەڭىز.
- كۇيەۋىم ەرجەت داۋلەتحان ءالى قىتاي جەرىندە. قۇجات جاعى رەتتەلمەي، وسىندا كەلە الماي جاتىر. ماماندىعى - مۇعالىم. ەكى قىزىمىز بار. ەكەۋى دە كەستە تىگە الادى. تۇڭعىشىمىز زۇپار شاكارىم اتىنداعى سەمەي مەملەكەتتىك ۋنيۆەرسيتەتىن «شەت ءتىلى» ماماندىعى بويىنشا بىتىرگەن. 4 تىلدە ەركىن سويلەيتىن پوليگلوت. قازىر سەمەي قالاسىندا اعىلشىن ءتىلى پانىنەن ساباق بەرەدى. كەنجەمىز شىنار 17 جاستا. ونىڭ قالاۋى - دارىگەر بولۋ.
- الداعى جوسپارلارىڭىز قانداي؟
- تىگىنشىلىكتى تاستاماي، كاسىبىمدى ارى قاراي دوڭگەلەتسەم دەيمىن. دۇكەن اشۋ جايلى ويىم بار. مال باسىن ارتتىرىپ، شارۋا قوجالىعىن دا قۇرعىم كەلەدى.
- اڭگىمەڭىزگە كوپ راحمەت!
تالعاتجان مۇحامەتبەك ۇلى
