ەرتەگىدەگىدەي ءومىر ءسۇرىپ جاتىرمىز: جەتىسايدا بالىق اۋلاۋدى كاسىپ ەتكەن كەلىنشەك تۇرادى

تۇركىستان. قازاقپارات - تۇركىستان وبلىسى جەتىساي اۋدانىنىڭ تۇرعىنى ەلميرا تولەيەۆانى جەرلەستەرى «بالىقشى كەلىنشەك» دەپ اتايدى.

سەبەبى، اۋىل مەكتەبىندە باستاۋىش سىنىپ وقۋشىلارىنا ساباق بەرەتىن ۇستاز بالىق اۋلاۋدى قوسىمشا كاسىپ ەتكەن. ءارى بالىق ەتىنەن كوپتەگەن تاماق تۇرلەرىن جاساپ، تابىس تاۋىپ ءجۇر.

ەلميرا قاناي قىزى جەتىساي اۋدانى شابلان دىلدابەكوۆ اۋىلدىق وكرۋگىندە تۇرادى. كۇندەلىكتى كەشكىسىن جولداسىمەن بىرگە قايىققا ءمىنىپ، قارماقپەن بالىق اۋلاۋ ۇيرەنشىكتى ءىسى. كولگە ءار بارعان سايىن 5,6 بالىقتان الىپ كەلەدى. ال، ۇيگە كەلگەن سوڭ، بالىقتان ءتۇرلى تاماق تۇرلەرىن دايىنداپ، اس ازىرلەيدى. سالات جاساپ، كاۋاپ پىسىرەدى. بالا- شاعادان ارتىلعانىن اۋدان اۋماعىندا ساۋداعا شىعارىپ، ساتادى. وسىلايشا شاعىن كاسىپكە اينالعان كۇندەلىكتى شارۋا ءۇيدىڭ شىعىنىن جاۋىپ، مول تابىسقا كەنەلتىپ وتىر.

«ورامالدى تاعىپ، ارنايى فورمانى كيىپ، قايىقتى كولىككە ارتامىز. ۇزىن ەتىكتە وزىمە جاراسا كەتەدى. سودان كولگە بارىپ، بالىق اۋلايمىز. كەي كۇندەرى شەلەگىمىزدىڭ بوس قايتاتىن كەزدەرى دە بار. مۇنداي ساتتە ەش قامىقپايمىن. قايتا كەلەسى كۇنى كوپتەۋ بالىق ءتۇسىپ جاتادى. بارلىعى نەسىبەمىز عوي» - دەيدى ول.

ەلميرانىڭ ەڭ ۇلكەن ولجاسى جايىن بالىعى بولعان. ونى جاعادان بايقاعان جولداسى ەكەۋى قۋالاپ ءجۇرىپ، قولمەن ۇستاپ الىپتى. تارازىعا سالىپ ولشەگەندە 44 كەلى شىققان. ال، قارماققا ىلىنەتىندەرى سازان، سۋداك، قاراس ەكەن.

«بيىل باقىتجانمەن وتانداسقانىما 14 جىل بولدى. العاش كەلىن بولىپ تۇسكەندە بالىق تۋرالى مۇلدەم بىلمەيتىنمىن، قىزىقپايتىن دا ەدىم. جولداسىم جانىنا ەرتىپ ءجۇرىپ، بالىق اۋلاۋدى ۇيرەتتى. ەرتەگى كەيىپكەرلەرى سەكىلدى ەكەۋىمىز قارماعىمىزدى الىپ، كۇندە قايىققا ءمىنىپ كەتەتىنبىز. قازىر بالىقتىڭ اتتارىن جاتقا بىلەمىن. ءارى وننان استام تاماقتىڭ ءتۇرىن دايىنداي الامىن» - دەيدى ول.

ەلميرا ءاردايىم داستارحانىن بالىقتان جاسالعان تاعامعا تولتىرىپ قويادى. ەتتىڭ ورنىنا بالىق اسىپ، كاۋاپقا دەيىن بالىقتان جاسايدى. سورپاسى مەن سالاتى، سامساسى دا دايىن. ال، ارتىلعانىن ساۋداعا شىعارادى. دۇكەندەرگە وتكىزەدى. توي جاسايتىنداردىڭ تاپسىرىسىن ورىنداپ بەرەدى.

«مەنەن كوبىنەسە بالىقتىڭ سورپاسىن، «حە» دەگەن سالاتىن، بۇقتىرما تاعامدارىن سۇرايدى. بالىقتى تاندىرعا، قازانعا، جەروشاققا پىسىرەمىن. تيىسىنشە، ءارقايسىسىنىڭ ءدامى ءارتۇرلى بولادى»، - دەيدى ول.

بالىقشى كەلىنشەكتىڭ 2 ۇل، 2 قىزى بار. ولار دا بالىق تاعامدارىنا ءۇيىر.

«جالىقتىق، باسقا تاعام ازىرلە» دەگەن اڭگىمە بولمايدى بۇل ۇيدە. ءتىپتى، قىلتاناقتارىن دا وزدەرى الىپ، قاۋىپسىز ەتىپ جەۋگە داعدىلانعان. ال، ءۇيدىڭ قاسىنداعى كورشى بولىپ تۇراتىن اتا- ەنەسى دە كەلىنى دايىنداعان بالىقتان جاسالعان تاعامداردى سۇيسىنە جەيدى.

«ەت تە جەيمىز. ءبىراق بالىقتى كوپ تۇتىنامىز. بالىقتا دارۋمەندەر كوپ. بىلگەن ادامعا بالىقتىڭ پايداسى جەتەرلىك. ۇنەمى تۇتىناتىندىقتان بولار بالالارىمنىڭ دەنساۋلىعى جاقسى. بالىق جەگەننىڭ ارقاسى شىعار، قۇدايعا شۇكىر بالالارىمنىڭ ەشقايسىسىندا ديسپلازيا سەكىلدى اۋرۋلار بولماعان. مۇلدەم اۋىرماعان، ءوزىم دە ەشقانداي ۋكول سالدىرماعانمىن. «جۇرت بالاڭ بار، ساباعىڭ بار، قالاي ۇلگەرەسىڭ؟» دەپ سۇراپ جاتادى. ايەل ادام بارلىعىنا ۇلگەرۋ كەرەك. سەبەبى، نيەت بولسا ءبارىن رەتتەۋگە بولادى»، - دەيدى ول.

بۇگىندە ەلميرا ينستاگرامم پاراقشاسى ارقىلى بالىقتان جاسالعان تاعامداردى دايىنداۋ بويىنشا ماستەر كلاستار ءوتىپ ءجۇر.

«بالىقشىنىڭ كەلىنشەگى» دەپ اتالاتىن پاراقشاسىنىڭ دا وقىرمانى كوبەيىپ كەلەدى. الەۋمەتتىك جەلىدەن اقشا تابا باستاعانىن كورگەن جولداسى بالىق ساتۋدان تۇسكەن قاراجاتتى جيناپ، سوڭعى ۇلگىدەگى «iphone 13» ماركالى تەلەفون الىپ بەرگەن.

«العاشقى كەزدەگى تەلەفونىم قاتىپ قالا بەرەتىن ەدى. ەسكى بولعاندىقتان، عالامتورعا كىرىپ شىعۋدا قيىندىق تۋدىراتىن. سونى بايقاعان جولداسىم مەرەكە قارساڭىندا جاڭا تەلەفون سىيلادى. ۇلكەن راحمەتىمدى ايتامىن. سونداي- اق، باقىتجاندى بالىقتان تابىس تابۋعا ۇيرەتكەن ۇستازىم دەپ بىلەمىن. بىرگە ءجۇرىپ تىنىمسىز ەڭبەك ەتتىك. ءۇي سالدىق، العان نەسيەلەرىمىزدى جاپتىق. بۇگىن، مىنە، سول ەڭبەكتىڭ جەمىسىن كورىپ وتىرمىز»، - دەيدى بالىقشى كەلىنشەك.

قايرات زاينيشيەۆ